Россия Ташқи ишлар вазирлиги Яқин Шарқдаги кескинликни зудлик билан юмшатишга чақирди
ТИВ АҚШ ва Исроил томонидан Эрон ҳудудига ҳаво ҳужумлари уюштирилганини қайд этиб, мазкур ҳаракатни суверен ва мустақил давлатга нисбатан олдиндан режалаштирилган қуролли тажовуз сифатида баҳолади.
Россия Ташқи ишлар вазирлиги Эрон атрофида юзага келган вазиятни зудлик билан сиёсий ва дипломатик йўлга қайтариш зарурлигини маълум қилди. Тегишли баёнот вазирлик расмий сайтида эълон қилинди.
Баёнотда қайд этилишича, Москва аввалгидек халқаро ҳуқуқ, ўзаро ҳурмат ва манфаатлар мувозанатига асосланган тинч ечимларни излашга кўмаклашишга тайёр. Россия томони можарони куч ишлатиш орқали ҳал этишга уринишлар минтақавий ва глобал хавфсизликка жиддий таҳдид солишини таъкидлади.
Россия ТИВ 28 февраль куни АҚШ ва Исроил томонидан Эрон ҳудудига ҳаво ҳужумлари уюштирилганини қайд этиб, мазкур ҳаракатни суверен ва мустақил давлатга нисбатан олдиндан режалаштирилган қуролли тажовуз сифатида баҳолади. Вазирлик фикрича, бундай ҳаракатлар халқаро ҳуқуқнинг асосий тамойиллари ва нормаларига зид ҳисобланади.
Москва, шунингдек, Вашингтон ва Тел-Авивни минтақани гуманитар, иқтисодий ҳамда эҳтимол радиологик фалокат ёқасига олиб келаётган хавфли саргузаштда айблади. Баёнотда ҳужумлар янгиланган музокара жараёни фонида ва ҳарбий тўқнашувдан манфаатдор эмаслик ҳақидаги сигнал ва кафолатларга қарамай амалга оширилгани алоҳида қайд этилди.
Россия томони Ядро қуролини тарқатмаслик тўғрисидаги шартнома тамойилларига путур етказилиши мумкинлигидан хавотир билдирди. Хусусан, MAGATE кафолатлари остидаги ядровий иншоотларга зарба бериш қабул қилиб бўлмас амалиёт экани таъкидланди.
Россия Ташқи ишлар вазирлиги халқаро ҳамжамиятни, жумладан БМТ ва MAGATE раҳбариятини Яқин Шарқдаги вазиятга холис ва муросасиз баҳо беришга ҳамда тинчлик ва барқарорликни таъминлашга қаратилган чораларни кўришга чақирди.
