Наманганда жазмани билан тил бириктириб эрини ўлдирмоқчи бўлган аёл қўлга олинди
Улар бу жиноятни қилиш учун қотил ёллашган.
Наманган вилояти Давлатобод туманида аёл ва унинг жазмани томонидан қотил ёллаб, одам ўлдириш билан боғлиқ жиноятнинг олди олинди. Бу ҳақда Ички ишлар вазирлиги ахборот хизмати маълум қилди.
Маълум қилинишича, 4 март куни Давлатобод туманида яшовчи аёл ўзининг жазмани билан олдиндан тил бириктириб, шаръий никоҳ асосида бирга яшаб келган турмуш ўртоғини 6 минг АҚШ доллари эвазига ўлдиртиришни режалаштиргани аниқланган.
Шундан сўнг Наманган вилояти Ички ишлар бошқармаси, Давлат хавфсизлик хизмати ҳамда прокуратура ходимлари ҳамкорлигида тезкор тадбир ўтказилган. Маълум бўлишича, буюртмачилар Telegram орқали шартли қотил билан боғланиб, эркакни Cobalt автомобилида ёлғиз юрган пайтда Андижон—Наманган йўлида жойлашган овлоқ ҳудудда ўлдириш, сўнг автомобилни ёқиб юбориш бўйича кўрсатмалар берган.
Тезкор тадбир давомида жабрланувчининг ўлдирилгани саҳналаштирилиб, ушбу жараён видеога олиниб буюртмачиларга кўрсатилган. Шундан сўнг улар келишилган пул маблағининг 5,5 минг АҚШ долларини топшираётган вақтида тезкор ходимлар томонидан ашёвий далиллар билан қўлга олинган.
Мазкур ҳолат юзасидан Наманган вилояти прокуратураси томонидан Жиноят кодексининг 25-моддаси орқали 97-моддаси иккинчи қисми билан жиноят иши қўзғатилган. Гумонланувчилар Жиноят-процессуал кодексининг 221-моддаси тартибида ушланган бўлиб, ҳозирда дастлабки тергов ҳаракатлари олиб борилмоқда.
