Тўрткўлда МИБ орқали 1,1 млрд сўмлик электр қарзи ундирилди
Маълум бўлишича, фуқаро ўз корхонасида электрдан ўғринча фойдаланиб 1,1 млрд сўм зарар етказган.
Фуқаро А.А. моддий даромад кўриш мақсадида ўзи бошқараётган оилавий корхонаси биносига электр энергиясини ҳисоблагичдан алоҳида тўғридан-тўғри улаб фойдаланиб келганлиги оқибатида “Ҳудудий электр тармоқлари” АЖга жами 1,1 млрд сўм зарар етказган.
Етказилган зарарни “Ҳудудий электр тармоқлари” АЖ “Энергосавдо” Қорақалпоғистон филиалига ундириш тўғрисида Жиноят ишлари бўйича Тўрткўл туман суди томонидан қарор қабул қилинган.
Ушбу ҳукмга асосан чиқарилган ижро варақаси Мажбурий ижро бюроси Тўрткўл туман бўлими иш юритувига келиб тушган ва бўлим давлат ижрочилари томонидан ижро ҳаракатларига киришилган.
Хусусан, қарздорнинг Ўзбекистон Республикасидан ташқарига чиқиш ҳуқуқига нисбатан чеклов ўрнатилиб, унга тегишли бўлган 2 та кўчмас мулкларга нисбатан тақиқ ўрнатилиб, шундан сўнг қарздорга етказилган 1,1 млрд. сўм жиноий зарарни тўлиқ тўлашга мажбур бўлган.
