Наманганда алиментдан қарздор ота нонвойхонадан топилди
Шундан сўнг у тегишли тартибда ушланиб, кейинги процессуал чоралар кўриш учун масъул бўлимга олиб кетилган.
Наманган вилоятининг Мингбулоқ туманида алимент тўлашдан бўйин товлаб юрган ва қидирувга берилган ота нонвойхонадан топилди. Бу ҳақида МИБ ахборот хизмати Zamon.uz'га маълум қилди.
Қайд этилишича, Наманган вилоятида ўтказилаётган навбатдаги рейд тадбири давомида кутилмаган ҳолат аниқланган. Мажбурий ижро бюроси инспекторлари ҳудуддаги текширув ишларидан сўнг нон харид қилиш учун нонвойхонага киришган.
Шу пайт нонвойхонада ишлаб юрган фуқаролардан бири ходимларни кўриб, ўзини олиб қочишга урингани инспекторлар эътиборини тортади. Шубҳа уйғотган мазкур шахс билан суҳбатлашилиб, унинг паспорт маълумотлари хизмат планшети орқали текширилганда, у алимент тўловларидан қарздор экани маълум бўлган.
Маълумотларга кўра, ушбу фуқарога нисбатан Бюронинг Мингбулоқ туман бўлими томонидан қидирув эълон қилинган экани ҳам аниқланган.
Натижада қидирувда бўлган шахс тегишли тартибда ушланиб, кейинги процессуал чоралар кўриш учун масъул бўлимга олиб кетилган.
