Николас Мадуро устидан суд жараёни бошланди
Агар у айбдор деб топилса, камида 20 йилга озодликдан маҳрум қилиш мумкин.
26 март куни Қўшма Штатларда Венесуэланинг собиқ президенти Николас Мадуро устидан суд жараёни бошланди. У ва унинг рафиқаси Силия Флорес Нью‑Йорк федераль судида наркотерроризм бўйича айбловларга дуч келмоқда. Reuters агентлиги маҳаллий манбаларга таяниб хабар берди.
Суд жараёни 2006 йилда қабул қилинган ва камдан‑кам ҳолларда қўлланадиган наркотерроризм тўғрисидаги қонун доирасида кўрилмоқда. Агар прокурорлар Мадурони айбдор деб топса, у камида 20 йилга озодликдан маҳрум қилиш жазоси билан жазоланиши мумкин.
Судда прокурорлар Мадуро ва бошқа айбланувчи расмийлар гийоҳванд моддалар савдоси орқали терроризмни молиялаштириш билан боғлиқ жиноятларни содир этганини исботлашга ҳаракат қилмоқда. Улар, хусусан, Колумбия инқилобий қуролли кучлари (FARC) каби террорчи деб топилган гуруҳлар билан ҳамкорликда кокаин ташиш бўйича фитна уюштиришда иштирок этганликда гумон қилинмоқда.
Мадуро ва Флорес суд олдида айбловларни қатъиян инкор этиб, АҚШнинг бу даъволарини сиёсий мотивга асосланган «империалистик фитна» деб атамоқда. Прокурорлар учун муҳим вазифа — гийоҳванд моддалар савдоси жиноятларини терроризм билан боғлашни суд олдида ишончли асослашдир.
Эслатиб ўтамиз, Николас Мадуро 3 январ куни Каракасда махсус операция давомида АҚШ махсус кучлари томонидан қўлга олинган ва кейинчалик АҚШга олиб кетилган эди.
