Эрон АҚШнинг 15 бандли режасини “реал эмас” деб баҳолади

Эрон Ташқи ишлар вазирлиги АҚШ томонидан тақдим этилган можарони ҳал қилиш бўйича 15 банддан иборат режа реал эмаслигини маълум қилди. Бу ҳақда вазирлик матбуот котиби баёнот берди.

 

Унинг сўзларига кўра, АҚШ томонидан илгари сурилган ҳужжатда “ортиқча ва мантиқсиз талаблар” мавжуд. Эрон томонига турли номлар остида тақдим этилган таклифлар — 15 бандли ёки бошқа кўринишдаги режаларда Теҳрон учун мақбул бўлмаган шартлар мавжудлиги таъкидланди.

 

Дипломатнинг айтишича, АҚШ музокараларни таклиф қилганида кўплаб давлатлар эҳтиёткорлик билан ёндашади, чунки Вашингтон дипломатиясига бўлган ишонч даражаси масаласи очиқ қолмоқда. У Эроннинг турли масалалар бўйича позицияси бошиданоқ аниқ бўлганини ҳам қайд этган.

 

Шунингдек, Теҳрон Вашингтоннинг музокараларга ҳақиқатан ҳам тайёр эканига шубҳа билан қараётганини билдирган. Таъкидланишича, АҚШ музокаралар жараёни давомида Эронга икки марта — 2025 йил июн ва 2026 йил февраль ойларида ҳужум қилган.

 

“Биз ҳозир АҚШ ҳарбий тажовузи кучайиб бораётган вазиятни бошдан кечирмоқдамиз. Шу сабабли барча саъй-ҳаракатларимиз ўзимизни ҳимоя қилишга қаратилган. Бу баёнотларни самимий деб ҳисобламаймиз”, — деган вазирлик вакили.

 

Аввалроқ Дональд Трамп АҚШ Эрон билан ҳам тўғридан-тўғри, ҳам воситачилар орқали музокаралар олиб бораётганини ва маслаҳатлашувлар “ижобий руҳда кечаётганини” билдирган эди.