Фарғоналик ота фарзандига 1 млрддан ортиқ алимент тўлади
Шу тариқа боланинг 18 ёшга тўлгунига қадар тўланиши лозим бўлган моддий таъминоти тўлиқ қопланиб, ижро иши тамомланган.
Фарғоналик фуқаро фарзанди вояга етгунига қадар тўланиши лозим бўлган 1 миллиарддан кўпроқ алимент пул маблағини бирданига тўлаб берди. Бу ҳақида МИБ ахборот хизмати Zamon.uz'га маълум қилди.
Қайд этилишича, Фуқаролик ишлари бўйича суднинг тегишли ижро варақасига асосан қарздор М.Х. дан ундирувчи К.Н. фойдасига 1 нафар фарзанди вояга етгунига қадар барча даромадларининг 1/4 қисми миқдорида алимент ундирилиши белгиланган.
Ушбу ижро варақа жорий йилнинг 11 март куни Бюронинг туман бўлим иш юритувига келиб тушган ҳамда шу куннинг ўзида тарафларга бу ҳақида хабарномалар юборилган.
Ижро ҳаракатлари давомида ижро ишига масъул бўлган давлат ижрочиси томонидан тарафларга ҳуқуқий тушунтиришлар берилган.
Маълум бўлишича, профилактик суҳбат давомида қарздор ва ундирувчи ўзаро қонуний никоҳдан ўтмасдан шаръий никоҳ асосида бир муддат бирга истиқомат қилишган ҳамда ўзаро келишмовчиликлар натижасида ундирувчи алимент олиш бўйича қарздорни судга берган.
Ушбу суд қароридан қарздорнинг ота-онаси хабар топишган ҳамда фарзандларининг ҳуқуқ ва мажбуриятларини тўлиқ англаган холда вояга етмаган фарзанд ўн саккиз ёшга тўлгунига қадар тўланиши лозим бўлган 1 миллиард 24 миллион сўм пул маблағини бирданига тўлаш истагини билдиришган.
Жорий йилнинг 29 март куни 1 миллиард 24 миллион сўм алимент пул маблағлари тўлиқ ундирувчига топширилган ҳамда ижро ҳужжати амалда тамомланган.
