2026–2027 ўқув йили учун 1-синфга қабул тартиби тасдиқланди
Қабул жараёнлари онлайн платформалар орқали босқичма-босқич амалга оширилади.
Ўзбекистон Мактабгача ва мактаб таълими вазирининг тегишли буйруғи билан 2026–2027 ўқув йилида умумий ўрта таълим мактабларининг 1-синфига қабул жараёнларини ташкил этиш тартиби тасдиқланди.
Ҳужжатга мувофиқ, 1-синфга қабул қилиш бўйича давлат хизмати жорий этиладиган туман (шаҳар)лар сони 64 тадан 135 тага, умумий ўрта таълим мактаблари сони эса 1956 тадан 5689 тага етказилган.
Қайд этилишича, 2026–2027 ўқув йилида давлат умумий ўрта таълим мактабларининг 1-синфига қабул жараёнлари Ягона интерактив давлат хизматлари портали (my.gov.uz) ҳамда Мактабгача ва мактаб таълими вазирлигининг электрон портали (my.maktab.uz) орқали амалга оширилади.
Қабул жараёни 2026 йил 20 июндан 31 июлгача микроҳудуд доирасида, 1–31 август кунлари эса микроҳудуддан ташқари ҳудудлардан амалга оширилиши белгиланган.
Амалдаги тартибга кўра, 1-синфга болалар улар 7 ёшга тўладиган йилда қабул қилинади. Шунга мувофиқ, 2026–2027 ўқув йилида 2019 йил 31 декабргача туғилган болалар мактабга қабул қилинади.
Шунингдек, давлат хизмати жорий этилмаган ҳудудларда қабул жараёнлари анъанавий тартибда мактаб раҳбарлари томонидан амалга оширилади. Қабул қилинган ўқувчилар ҳақидаги маълумотлар вазирликнинг adm.maktab.uz электрон тизимига киритиб борилади.
Вазирлик маълумотига кўра, қабул жараёнларига доир барча маълумотлар — жумладан қабул режаси, муддатлар, микроҳудудлар ҳамда бошқа тил синфлари бўйича талаблар — мактаб биноларининг кўринарли жойларига жойлаштирилади.
Қабул муддати якунлангач, микроҳудуд ва ундан ташқари ҳудудлар бўйича қўшимча қабулга йўл қўйилмаслиги қатъий белгиланган.
Шунингдек, 2026 йил 10 августга қадар 1-синфга қабул қилинган болалар бўйича маълумотлар асосида 12 турдаги ўқув қуролларидан иборат Президент совғаларини етказиб бериш режалаштирилган. Ушбу жиҳозлар 20 августгача мактабларга тарқатилиши белгиланган.
