Исломободда Эрон–АҚШ музокараларининг бир босқичи якунланди

Покистон воситачилигида Исломободда Эрон ва АҚШ делегациялари ўртасида ўтказилаётган музокараларнинг бир босқичи якунланди. Бу ҳақда Tasnim агентлиги маълум қилди.

 

Маълум қилинишича, юзма-юз музокараларнинг мазкур босқичи якунлангач, икки давлат делегациялари ҳозирда муҳокама қилинаётган масалалар юзасидан ёзма ҳужжатлар ва таклифлар алмашиш жараёнига ўтган.

 

Маълумотларга кўра, шанба куни бир неча соат давом этган эксперт даражасидаги учрашувларда Эрон ва АҚШ делегацияларининг техник гуруҳлари иштирок этган.

 

Музокаралар давомида томонлар кун тартибидаги масалаларни батафсил муҳокама қилган, босқич якунida эса ўз позицияларини ёзма шаклда алмашишга киришган.

 

Шунингдек, хабарда қайд этилишича, 28 февраль куни Эрон Ислом инқилоби раҳбари Оятуллоҳ Али Хоманаий ва бир қатор ҳарбий қўмондонларга қилинган ҳужум ҳамда АҚШ ва Исроил томонидан амалга оширилган кенг кўламли ҳарбий операциядан сўнг минтақадаги вазият кескинлашган. Бунга жавобан Эрон қуролли кучлари минтақадаги АҚШ ва Исроил позицияларига зарбалар бергани, бу эса томонлар ўртасидаги қарама-қаршиликни янада кучайтиргани қайд этилган.

Шу билан бирга, сўнгги 40 кун давомида Эрон томонидан амалга оширилган қарши ҳужумлар АҚШ ва Исроил ҳарбий объектларига сезиларли зарар етказгани, бу эса томонларнинг тезкор ғалаба ҳақидаги кутган натижаларини ўзгартиргани таъкидланган.

 

Кескинликни юмшатиш мақсадида Покистон воситачилигида 8 апрель куни икки ҳафталик сулҳ бўйича келишувга эришилган бўлиб, бу Исломободда музокаралар ўтказиш учун шароит яратган.

 

Эрон томони музокаралар учун ўзининг 10 банддан иборат режасини илгари сурган бўлиб, унда АҚШ қўшинларининг минтақадан чиқиши, санкцияларнинг бекор қилиниши ҳамда стратегик Ҳормуз бўғози устидан назорат масалалари ўрин олган.