Қирғизистон собиқ президенти Қурманбек Бакиевнинг укаси Ўзбекистонда вафот этгани айтилмоқда
Аҳмат Бакиев 66 ёшда бўлган ва вафоти сабаблари расман очиқланмаган.
Қурманбек Бакиевнинг укаси Аҳмат Бакиев Ўзбекистон ҳудудида вафот этди. Бу ҳақда Спутник Қирғизистон манбаларга таяниб хабар берди.
Маълумотларга кўра, марҳумнинг жасади Жалолобод вилоятига олиб борилиши режалаштирилган бўлиб, у аждодлари яшаган Масадан (Тейит) қишлоғида дафн этилади.
Дастлабки маълумотларга кўра, Аҳмат Бакиев 66 ёшда бўлган. Унинг вафоти сабаблари расман очиқланмаган.
Эслатиб ўтамиз, у аввалроқ Қирғизистонда бир қатор оғир жиноятлар, жумладан, оммавий тартибсизликларни ташкил этиш, этник адоватни қўзғатиш, товламачилик ва фирибгарлик айбловлари билан судланган эди. 2011 йилда унга нисбатан 7 йил муддатга озодликдан маҳрум қилиш жазоси тайинланган.
Шунингдек, 2012 йилда унинг даволаниш учун ётқизилган шифохонадан қочиб кетгани ҳақида хабарлар тарқалган эди.
Маълумот учун, Қурманбек Бакиевнинг ўзи ҳам мамлакатда содир бўлган воқеалар юзасидан сиртдан судланиб, узоқ муддатли қамоқ жазосига ҳукм қилинган ва ҳозирда хорижда истиқомат қилмоқда.
