АҚШ ва Эрон яқин кунларда тўғридан-тўғри музокараларни тиклаши мумкин — Reuters

 

Reuters агентлиги манбаларига таяниб хабар беришича, АҚШ ва Эрон ўртасида тўғридан-тўғри музокараларни қайта бошлаш масаласи муҳокама қилинмоқда.

 

Маълумотларга кўра, икки давлат делегациялари яқин кунларда Исломобод шаҳрига ташриф буюриши мумкин. Музокараларнинг аниқ санаси ҳозирча эълон қилинмаган, бироқ манбалардан бирининг таъкидлашича, делегациялар жума кунидан якшанбагача бўлган муддатда учрашув ўтказиш имкониятини кўриб чиқмоқда.

 

Агентликка кўра, Эрон томони музокараларнинг навбатдаги босқичига тайёр эканини воситачи сифатида иштирок этаётган Покистон ҳукуматига маълум қилган. Шу билан бирга, Оқ уйнинг ушбу эҳтимолий учрашув бўйича расмий позицияси ҳозирча очиқланмаган.

 

СNN телеканали хабарига кўра, АҚШ расмийлари эҳтимолий сана ва жой масаласини муҳокама қилмоқда. Канал манбалари музокараларни “дастлабки босқичда” деб баҳолаб, уларнинг ўтказилиши минтақадаги вазият яқин кунларда яхшиланишига боғлиқ эканини қайд этган.

 

Аввалроқ The Atlantic нашри журналисти Араш Азизи учрашув 16 апрель куни бўлиб ўтиши мумкинлигини илгари сурган эди.

 

Эслатиб ўтамиз, делегацияларнинг аввалги учрашуви 11 апрель куни бўлиб ўтган бўлиб, бу 1979 йилда Ислом Республикаси ташкил этилганидан бери икки давлат ўртасидаги энг юқори даражадаги мулоқотлардан бири сифатида баҳоланган. Бироқ ушбу учрашув якунлари кутилган натижани бермаганини маълум қилинган эди.