Хорижий рақамлардан бўлаётган шубҳали қўнғироқларга жавоб берманг — ДХХ
Абонентнинг овози ёзиб олиниб, кейинчалик сунъий интеллект ёрдамида сохталаштирилган ҳолда яқинларини алдашда қўлланилиши мумкин.
Ўзбекистон Республикаси Давлат хавфсизлик хизмати фуқароларни сўнгги вақтларда кўпайиб бораётган киберфирибгарлик ҳолатларидан огоҳ бўлишга чақирди.
Маълум қилинишича, ўзбекистонликларнинг телефон рақамларига хориждан амалга оширилаётган шубҳали қўнғироқлар сони ортган. Мутахассислар таҳлилига кўра, бундай қўнғироқлар оддий телефон алоқаси орқали эмас, балки интернет ва махсус дастурлар ёрдамида амалга оширилмоқда. Шу орқали фирибгарлар ўзининг ҳақиқий рақамини яшириб, телефон экранида исталган давлатга тегишли сохта рақамни акс эттира олади.
Қайд этилишича, қўнғироқлар интернет орқали юборилгани ва рақамлар олдиндан сохталаштирилгани сабабли мобил алоқа операторлари учун қўнғироқ манбасини аниқлаш қийинлашади. Бундай рақамлар махсус базаларда мавжуд бўлмайди ва улар вақтинчалик, сохталаштирилган рақамлар ҳисобланади.
ДХХга кўра, бу турдаги қўнғироқлар бир қатор хавфларни келтириб чиқаради. Жумладан, хорижий рақамларга қайта қўнғироқ қилиш абонент балансидаги маблағнинг ечиб олиниши билан якунланиши мумкин. Шунингдек, фирибгарлар ўзларини турли ташкилотлар ходими сифатида таништириб, фуқароларнинг шахсий маълумотлари ва банк карталарига оид кодларни қўлга киритишга уринади.
Бундан ташқари, қўнғироққа жавоб бериш орқали рақам “фаол” эканини билдиради ва бу келгусида фирибгарлик уринишларининг кўпайишига олиб келиши мумкин. Айрим ҳолларда эса абонентнинг овози ёзиб олиниб, кейинчалик сунъий интеллект ёрдамида сохталаштирилган ҳолда яқинларини алдашда қўлланилиши эҳтимоли бор.
ДХХ фуқароларга нотаниш ва шубҳали хорижий рақамлардан келаётган қўнғироқларга жавоб бермаслик, уларга қайта қўнғироқ қилмаслик, бундай рақамларни блоклаш ҳамда шахсий маълумотларни бегоналарга ошкор этмасликни тавсия қилди.
