Коррупцияни фақат сунъий интеллект ва рақамлаштириш йўқ қилади — Шавкат Мирзиёев
Қурилиш билан боғлиқ аризаларнинг рад этилишига коррупция сабаб бўлаётгани маълум қилинди.
Ўзбекистонда ўтган йили қурилиш билан боғлиқ 2,6 миллиондан ортиқ мурожаатларнинг қарийб учдан бири рад этилгани маълум қилинди. Президент бу ҳолатни кескин танқид қилиб, рад этишлар ортида тизимли муаммолар ва коррупция аломатлари борлигини таъкидлади.
Давлат раҳбари масъуллар кўпинча аризаларни “камчилиги бор” деган сабаб билан қайтаришини, бироқ чуқур таҳлил қилинса, масал кўплигини, бу ҳолат коррупция эканини қайд этди. Ушбу муаммога барҳам беришнинг асосий йўли сифатида жараёнларни тўлиқ рақамлаштириш ва сунъий интеллектдан фойдаланиш зарурлиги таъкидланди.
Қайд этилишича, фуқаролар ва тадбиркорлар қурилиш ишларини бошлаш учун аввал лойиҳалашга рухсат олиш, сўнг архитектура-режалаштириш топшириғини ишлаб чиқиш учун алоҳида-алоҳида мурожаат қилади. Бу эса кўп вақт талаб қилмоқда. Тошкент шаҳрида ушбу икки хизматни бир босқичда кўриб чиқиш амалиёти жорий этилиб, ҳужжатларни келишиш муддати 3–4 баробарга қисқарган. Ушбу тажрибани 1 июлдан бошлаб республиканинг барча ҳудудларида жорий этиш топширилди.
Шунингдек, муҳандислик-коммуникация тармоқларига уланиш тартиби ҳам соддалаштирилади. Ҳозирда электр, газ, сув ва канализация тармоқларига уланиш учун ҳар бир ташкилотга алоҳида мурожаат қилиш талаб этилади. Янги тизимга кўра, 1 июлдан бошлаб битта ариза ва ягона тўлов асосида барча коммунал хизматлар бўйича техник шартларни олиш имконияти яратилади.
Йиғилишда ҳудудларда шаҳарсозлик кенгашларига аъзо 26 та идора ўртасида етарли ҳамкорлик йўқлиги ҳам сансалорликнинг асосий сабабларидан бири сифатида кўрсатилди. Шу боис эндиликда ушбу кенгашларга Тошкент шаҳри ва вилоятлар ҳокимлари шахсан раҳбарлик қилиб, тадбиркорларнинг масалаларига якуний ечим бериши белгиланди.
Бундан ташқари, “Шаффоф қурилиш” рейтинг тизимидаги айрим камчиликлар ҳам қайд этилди. Хусусан, қурувчиларнинг лизинг асосида олинган техникалари ҳисобга олинмаётгани танқид қилинди. Ушбу техникалар инобатга олинса, камида 500 та корхонанинг рейтинги ошиб, умумий қиймати 17 триллион сўмлик бозорга кириш имконияти пайдо бўлиши мумкинлиги таъкидланди. Шу муносабат билан Қурилиш вазирлигига лизинг техникалари бўйича электрон база яратиб, уни “Шаффоф қурилиш” тизимига интеграция қилиш топширилди.
Шунингдек, пудрат ташкилотлари учун чет элдан йилига фақат битта махсус техника олиб кириш бўйича амалдаги чекловни бекор қилиш зарурлиги қайд этилди.
Умуман олганда, мутасаддиларга уч ой муддатда қурилишга рухсат олишдан тортиб, объектни фойдаланишга топширишгача бўлган барча жараёнларни қайта кўриб чиқиш, талаблар, муддатлар ва тўловларни камида икки баробарга қисқартириш бўйича қарор лойиҳасини ишлаб чиқиш вазифаси юклатилди.
