Ўзбекистон фуқароларига Германиядаги ҳарбий музейга кириш таъқиқланди
Шунингдек, Россия, Украина, Қозоғистон, Озарбайжон, Хитой, Шимолий Корея ва бошқа бир қатор давлатларга ҳам чеклов жорий этилган.
Германиянинг Кобленз шаҳрида жойлашган Европанинг энг йирик ҳарбий-техник музейларидан бири бир қатор давлатлар фуқаролари учун ташриф буюриш тартибига чекловлар жорий этди. Мазкур рўйхатга Ўзбекистон ҳам киритилган.
Қайд этилишича, қарор миллий хавфсизлик талаблари ҳамда SÜG — яъни Германиянинг хавфсизликни текшириш тўғрисидаги қонуни асосида қабул қилинган.
Янги тартибга кўра, хавфсизлик нуқтайи назаридан “махсус хавф гуруҳи”га киритилган мамлакатлар фуқароларининг музей ҳудудига кириши вақтинча чекланган. Ушбу рўйхатдан Россия, Украина, Қозоғистон, Арманистон, Озарбайжон, Грузия, Молдова, Хитой, Шимолий Корея ва бошқа бир қатор давлатлар ҳам ўрин олган.
Мазкур музей ўзининг ноёб ҳарбий техника ва қурол-аслаҳа коллекцияси билан машҳур бўлиб, унда Биринчи жаҳон уруши даврига оид танклар, замонавий Леопард 1 моделлари ҳамда НАТОга тегишли транспорт воситаларининг ноёб прототиплари намойиш этилади. Музей 1982 йилдан буён ташриф буюрувчилар учун очиқ бўлиб келмоқда.
Расмийларга кўра, мазкур чекловлар хавфсизлик чораларини кучайтириш мақсадида жорий этилган бўлиб, уларнинг амал қилиш муддати ва тартиби вазиятга қараб қайта кўриб чиқилиши мумкин.
