АҚШ Россия нефтига қарши санкцияларни қайта тиклади

АҚШ президенти Доналд Трамп маъмурияти Россия нефти ва нефть маҳсулотларига нисбатан жорий этилган вақтинчалик санкция енгиллигини тўхтатади. Бу ҳақда Bloomberg'га таяниб, Moscow Times хабар берди.

 

Маълум қилинишича, 2026 йил 12 мартгача кемаларга юкланган нефтни қонуний сотишга рухсат берган ушбу чоралар 11 апрель куни ўз кучини йўқотган. Мазкур енгиллик Яқин Шарқдаги уруш фонида энергия бозорларида юзага келган кескинлик сабаб жорий этилган эди.

 

Хусусан, Эрон томонидан Ҳормуз бўғозининг ёпилиши глобал нефть экспортининг кунига қарийб 13 миллион баррелга қисқаришига ва нархларнинг 100 доллардан ошишига олиб келган. Шу шароитда Оқ уй глобал бозорда таклифни ошириш мақсадида Россия ва Эрон нефтига қўйилган айрим чекловларни вақтинча юмшатган эди.

 

The New York Times маълумотига кўра, Эрон нефтини сотишга берилган қисқа муддатли рухсат 19 апрелда якунига етади. АҚШ Молия вазирлиги ушбу муддат ҳам узайтирилмаслигини билдирган.

 

Шу билан бирга, Халқаро энергия агентлиги ҳисоботига кўра, 2026 йил март ойида Россиянинг нефть ва нефть маҳсулотлари экспортидан тушган даромади 19 миллиард долларга етган. Бу февраль ойига нисбатан 9,3 миллиард долларга, ўтган йилнинг шу даврига нисбатан эса 4,8 миллиард долларга кўпдир.

 

Ҳисоботда қайд этилишича, Россиядан нефть экспорти кунига 0,27 миллион баррелга ошиб, 4,6 миллион баррелни ташкил этган. Нефть маҳсулотлари экспорти эса 0,05 миллион баррелга кўпайиб, 2,5 миллион баррелга етган. Натижада умумий экспорт ҳажми кунига 7,1 миллион баррелгача ошган.

 

Бундан ташқари, март ойида Россияда нефть қазиб олиш ҳажми кунига 0,29 миллион баррелга кўпайиб, 8,96 миллион баррелни ташкил этган. Бу кўрсаткич ОПЕC+ доирасида белгиланган квотадан 0,61 миллион баррелга кам бўлса-да, суюқ углеводородлар умумий қазиб олиш ҳажми кунига 10,32 миллион баррелгача етгани таъкидланган.