Фаррух Зокиров “Буюк хизматлари учун” ордени билан мукофотланди
“Ялла” ансамбли раҳбари Ўзбекистон маданиятини ривожлантиришдаги хизматлари ҳамда таваллудининг 80 йиллиги муносабати билан тақдирланди.
Фаррух Зокиров замонавий ўзбек қўшиқчилик санъатини ривожлантириш, миллий эстрада ижрочилигини янги босқичга олиб чиқиш, маданий меросни асраб-авайлаш ҳамда уни халқаро миқёсда тарғиб этишдаги улкан хизматлари учун давлат мукофоти билан тақдирланди.
Шавкат Мирзиёев томонидан имзоланган фармонга мувофиқ, Фаррух Зокиров “Буюк хизматлари учун” ордени билан мукофотланди.
Мукофотлаш қарорида таъкидланишича, санъаткорнинг ўзига хос истеъдоди ва самарали ижодий фаолияти миллий эстрада санъатини ривожлантиришга, маданиятимиз нуфузини оширишга ҳамда ёш истеъдодларни қўллаб-қувватлашга хизмат қилган.
Шунингдек, у «Ялла» ансамблига асос солиб, уни халқаро миқёсда тан олинган ижодий жамоага айлантиргани, ёш ижодкорларни тарбиялаш ва уларнинг қобилиятини рўёбга чиқаришдаги ҳиссаси билан алоҳида эътироф этилди.
Қайд этилишича, мазкур мукофот санъаткорнинг таваллудининг 80 йиллиги муносабати билан ҳам топширилди.
