Президент Шавкат Мирзиёев Бутунжаҳон таэквондо федерацияси президентини “Дўстлик” ордени билан тақдирлади

 

Шавкат Мирзиёев 15 апрель куни ёшлар ўртасидаги жаҳон чемпионати доирасида Ўзбекистонда бўлиб турган Бутунжаҳон таэквондо федерацияси президенти Чо Чунг Вонни қабул қилди.

 

Учрашувда сўнгги йилларда таэквондо йўналишида Ўзбекистонда сезиларли ўсиш кузатилгани қайд этилди. Мамлакатда ушбу спорт тури билан шуғулланувчилар сони деярли икки баробарга ошиб, 35 минг нафарга етгани таъкидланди. Шунингдек, ўзбекистонлик спортчилар Парижда бўлиб ўтган Олимпия ва Паралимпия ўйинларида умумжамоа ҳисобида учинчи ўринни эгаллагани алоҳида қайд этилди.

 

Чо Чунг Вон Ўзбекистонда спортни ривожлантириш, ёшлар орасида соғлом турмуш тарзини кенг тарғиб этиш ва замонавий инфратузилма яратиш бўйича амалга оширилаётган ислоҳотларни юқори баҳолади.

 

Томонлар ҳамкорликни янада кенгайтириш, жумладан профессионал спортчилар ва ҳакамлар тайёрлаш, сунъий интеллект ва спорт тиббиёти соҳасида тажриба алмашиш, шунингдек, халқаро мусобақаларни Ўзбекистонда мунтазам ўтказиш масалаларини муҳокама қилдилар.

 

Учрашув якунида Шавкат Мирзиёевга мамлакатда таэквондони ривожлантиришга қўшган ҳиссаси учун Бутунжаҳон таэквондо федерациясининг олий мукофоти — “Шон-шараф ордени” топширилди.

 

Шунингдек, Чо Чунг Вон давлат раҳбарига Дўстлик ордени билан тақдирланди.

 

Қайд этилишича, ушбу мукофот илк бор айнан давлат раҳбарига топширилган бўлиб, бу Ўзбекистонда таэквондо ва спортни ривожлантириш борасидаги ислоҳотларнинг халқаро миқёсда эътироф этилганини кўрсатади.