Берлинда илк бор Ўзбекистон–Германия касбий таълим форуми бўлиб ўтди
Германиядаги иш берувчилар билан бир нечта ҳамкорлик шартномалари имзоланди.
Форум Берлин шаҳрида жойлашган Ўзбекистон Республикаси Элчихонасида ташкил этилди. Мазкур учрашувда Германиядаги таълим дастурлари, халқаро баҳолаш, тил курслари, малака ошириш, ўқувчилар алмашинув каби масалалар бўйича фаолият юритадиган турли ташкилотларнинг вакиллари иштирок этди.
Ушбу форум Deutsche Gesellschaft für Internationale Zusammenarbeit (GIZ) ва“ТехVЕТ II” лойиҳалари ва Ўзбекистоннинг Германиядаги элчихонаси, Миграция агентлиги билан ҳамкорликда ташкил этилди. Тадбир давомида Ўзбекистонда касбий таълим тизимида амалга оширилаётган кенг кўламли ислоҳотлар алоҳида эътироф этилди.
Шунингдек, учрашувда Республика ҳудудларидаги касбий таълим бошқармалари раҳбарлари ҳамда техникум директорлари Германиядаги иш берувчилар билан бир нечта ҳамкорлик шартномаларини имзолади.
Ушбу келишувлар касбий таълим тизимини халқаро стандартлар асосида ривожлантириш, мутахассислар тайёрлаш сифатини ошириш ҳамда Ўзбекистон техникумларида Германия меҳнат бозорининг талабларига мос кадрлар етиштиришда муҳим аҳамият касб этади.
