20–21 апрель кунлари Самарқандда трансмиллий наркотаҳдидларга қарши глобал форум бўлиб ўтади
Тадбир БМТ Наркотиклар ва жиноятчилик бўйича бошқармаси ҳамкорлигида ташкил этилади.
2026 йил 20–21 апрель кунлари Самарқанд шаҳрида БМТ Наркотиклар ва жиноятчилик бўйича бошқармаси ҳамкорлигида “Жамоат саломатлиги ва хавфсизлигини таъминлаш мақсадида трансмиллий наркотаҳдидларга қарши курашиш” мавзусида глобал форум бўлиб ўтади.
Мазкур тадбирни ташкил этишдан асосий мақсад наркотикларнинг ноқонуний айланишига қарши кураш самарадорлигини ошириш, илғор халқаро тажрибаларни ўрганиш ва амалиётга жорий этиш, замонавий таҳдидларга қарши комплекс ёндашувларни ишлаб чиқиш ҳамда халқаро ҳамкорликни мустаҳкамлашдан иборат.
Тадбирда Бирлашган Миллатлар Ташкилоти, Интерпол, Европа Иттифоқи, Шанхай ҳамкорлик ташкилоти, Мустақил Давлатлар Ҳамдўстлиги, Жаҳон божхона ташкилоти ҳамда бошқа 20 дан ортиқ нуфузли халқаро тузилмалар вакиллари иштирок этиши кутилмоқда.
Шунингдек, 50 га яқин давлатдан ҳуқуқни муҳофаза қилувчи органлар раҳбарлари, 500 нафарга яқин халқаро эксперт ва соҳа мутахассислари қатнашади.
