Японияда 7,5 баллик зилзила содир бўлди

Япония қирғоқлари яқинида магнитудаси 7,5 гача бўлган кучли зилзила юз берди. Бу ҳақда CNN хабар берди.

 

 

Маълум қилинишича, Япония Метеорология агентлиги Ивате префектураси ҳамда Хоккайдо ва Аомори ҳудудларининг айрим қисмлари учун 3 метр баландликдаги цунами хавфи ҳақида огоҳлантирди. Шимоли-шарқий Япониянинг бошқа ҳудудлари учун эса тахминан 1 метргача бўлган цунами эҳтимоли қайд этилди.

 

АҚШнинг цунами огоҳлантириш тизими Япониянинг Хонсю оролининг шарқий қирғоқлари яқинида содир бўлган зилзила магнитудаси 7,4 га тенг эканини маълум қилган. Цунами хавфи 08:52 UTC  вақтида эълон қилинган. Кейинчалик Япония миллий агентлиги зилзила кучини 7,5 га қайта баҳолади, бироқ бу тафовут сабаблари ҳозирча аниқ эмас.

 

Воқеа жойида бўлган CNN продюсерининг Токиодан хабар беришича, улар жойлашган бино қарийб етти дақиқа давомида тебранган.

 

Япония бош вазири Санаэ Такаичи зарар кўрган ҳудудлар аҳолисини дарҳол эвакуация қилишга чақирди ва ҳукумат фавқулодда вазиятлар бўйича тезкор штаб тузганини маълум қилди.

 

“Цунами хавфи эълон қилинган ҳудудлардаги аҳоли дарҳол баландроқ жойларга ёки махсус эвакуация биноларига кўчиши керак”, — деди Такаичи.

 

Унинг таъкидлашича, ҳукумат зарар кўламини баҳолаш ва фавқулодда чораларни кўриш учун “барча имкониятларни ишга солмоқда”. Ҳозирча жабрланганлар ва моддий зарар ҳажми аниқлаштирилмоқда, яқин орада батафсил маълумотлар тақдим этилади.

 

Шунингдек, Токио ва Син-Аомори станциялари ўртасида қатновчи тезюрар поезд оператори электр таъминотидаги узилиш сабаб ҳаракат вақтинча тўхтатилганини маълум қилган.