Германия ҳукумати Россияни ўз ҳудудидаги объектларга "тўғридан-тўғри таҳдид" қилишда айбламоқда

Германия ҳукумати Россиянинг Берлиндаги элчисини Ташқи ишлар вазирлигига чақиртириб, Германиядаги объектларга нисбатан “тўғридан-тўғри таҳдид” қиладиган баёнотларни кескин қоралади. Бу ҳақда Al Jazeera ёзмоқда.

 

Маълум қилинишича, ўтган ҳафта Россия Мудофаа вазирлиги Украина мудофаа саноати билан боғлиқ деб ҳисобланган 21 та компания рўйхатини эълон қилган эди. Улар орасида Германиянинг камида учта компанияси ҳам тилга олинган бўлиб, уларнинг Украина учун дрон (УАВ) етказиб беришда иштирок этаётгани қайд этилган.

 

Россия томони ушбу корхоналарнинг жойлашуви ва фаолияти ҳақида очиқ маълумот берган.Вазирлик хабарида ўша жойлар нишонга олиниши мумкинлиги ҳақидаги ноаниқ таклиф мавжуд эди.

 

“Европа жамоатчилиги нафақат ўз хавфсизлигига таҳдидларнинг асл сабабларини аниқ тушуниши, балки ўз мамлакатларида Украина учун учувчисиз учиш аппаратлари (УАВ) ва уларнинг бутловчи қисмларини ишлаб чиқараётган украин ҳамда ъқўшмаъ корхоналарнинг манзиллари ва жойлашувини ҳам билиши керак”, — дея ёзган Россия Мудофаа вазирлиги.

 

Германия Ташқи ишлар вазирлиги маълумотига кўра, ушбу таҳдидлар Украинани қўллаб-қувватлашга қаратилган сиёсатни заифлаштириш ва Европа иттифоқининг бирлигини синовдан ўтказишга уриниш сифатида баҳоланмоқда.

 

“Бизни қўрқитиб бўлмайди. Германияда ҳар қандай таҳдид ва жосуслик фаолияти мутлақо қабул қилиб бўлмайди”, — дейилади вазирлик баёнотида.

 

Россия элчихонаси ҳозирча мазкур масалага изоҳ бермаган.

 

Шунингдек, Германия ва Украина стратегик мудофаа ҳамкорлигини кучайтиришга келишиб олган. Келишув доирасида ҳаво мудофаасини мустаҳкамлаш ва дрон ишлаб чиқариш соҳасида ҳамкорликни кенгайтириш кўзда тутилган.

 

Томонлар қўшма баёнотда ҳаво мудофааси бўйича ҳамкорликни чуқурлаштириш, шунингдек Украина дрон саноатини қўллаб-қувватлаш ва қўшма ишлаб чиқариш лойиҳаларини ривожлантиришни режалаштирганини билдирган.

 

Душанба куни Россия хавфсизлик идоралари Германия фуқароси бўлган аёлни ҳибсга олди. Россия Федерал хавфсизлик хизмати (ФСБ) маълумотига кўра, у Кавказдаги Пятигорск шаҳрида портловчи қурилма билан қўлга олинган ва Украина билан боғлиқ эҳтимолий режа доирасида ҳаракат қилганликда гумон қилинмоқда.

 

Германия Ташқи ишлар вазирлиги бу ҳодисалардан хабардор эканини, бироқ шахсий маълумотлар ва тергов жараёни сабабли қўшимча изоҳ бермаслигини билдирди.