Германия авиакомпанияси ёнилғи нархлари туфайли минглаб рейсларини бекор қилди

Германиянинг Lufthansa авиакомпанияси авиаёнилғи нархларининг кескин ошиши сабаб ёзги мавсумда 20 мингта қисқа масофали рейсни қисқартиришини маълум қилди, дея хабар бермоқда BBC.

 

Компания баёнотига кўра, АҚШ–Исроил ва Эрон ўртасидаги можаро фонида авиаёнилғи нархлари икки бараварга ошган, бу эса айрим парвозларнинг чекланишига олиб келган.

 

Қайд этилишича, бошқа авиакомпаниялар, жумладан Air France-KLM ва Delta Air Lines ҳам айрим рейсларни вақтинча бекор қилган ёки харажатларни қоплаш мақсадида чипта нархларини оширган.

 

Мутахассислар можаро давом этар экан, рейслар қисқариши ва авиачипталар нархининг яна ошишини истисно этмаяпти.

 

Маълумотларга кўра, Европага етказиб бериладиган авиаёнилғининг қарийб ярми Форс кўрфази минтақасига тўғри келади. Асосий таъминот йўли ҳисобланган Ҳормуз бўғози орқали ташувлар Эрон томонидан чеклангани нархларнинг ошишига таъсир кўрсатган.

 

Шунингдек, Қувайтдаги Ал-Зоур нефтни қайта ишлаш заводи Европа авиаёнилғи импортининг тахминан 10 фоизини таъминлайди.

 

Халқаро энергия агентлиги ўтган ҳафта Европада авиаёнилғи захиралари қисқа муддат ичида тугаши мумкинлиги ҳақида огоҳлантирган. Шу билан бирга, айрим ҳукуматлар ва авиакомпаниялар ҳозирча таъминотда жиддий узилишлар кузатилмаётганини билдирган.

 

Lufthansa Европа йўналишлари қисқартирилишини тасдиқлар экан, узоқ масофали халқаро рейслар сақланиб қолишини маълум қилди. Компания ушбу чоралар орқали тахминан 40 минг метрик тонна авиаёнилғини тежашни режалаштирмоқда.

 

Аввалроқ авиакомпания Европадаги CityLine қисқа масофали парвоз дастурини ёпишни тезлаштириши ва 27 та самолётни эксплуатациядан чиқаришини билдирган эди. Бунга юқори ёнилғи нархлари ҳамда меҳнат низолари сабаб бўлаётгани қайд этилган.

 

Компания маълумотига кўра, рейсларни қисқартиришнинг дастлабки 120 таси аллақачон амалга оширилган бўлиб, улар орасида Франкфуртдан Полша ва Норвегияга йўналишлар ҳам бор.