Ўзбекистонда ёнғин хавфсизлиги қоидаларини бузганлик учун жазолар кучайтирилди

Ўзбекистонда ёнғин хавфсизлиги қоидаларини бузганлик учун жавобгарлик чораларини кучайтиришга қаратилган қонун қабул қилинди. Бу ҳақда Адлия вазирлиги тегишли ҳужжатга таяниб маълум қилди.

 

Қонунга мувофиқ, Маъмурий жавобгарлик тўғрисидаги кодексга бир қатор ўзгартириш ва қўшимчалар киритилди. Унга кўра, корхоналар, муассасалар, ташкилотлар, оммавий жойлар, омбор бинолари, ётоқхоналар ҳамда турар жойларда ёнғин хавфсизлиги қоидаларини бузиш, шунингдек, тегишли объектларни лойиҳалаш, қуриш ва реконструкция қилишда қонунбузарликларга йўл қўйган шахсларга нисбатан жарималар оширилади.

 

Янги тартибга кўра, жисмоний шахсларга 1 дан 3 БҲМгача, мансабдор шахсларга эса 3 дан 10 БҲМгача жарима қўлланилади. Амалдаги тартибда мансабдор шахслар учун жарима 3 дан 7 БҲМгача этиб белгиланган.

 

Шунингдек, Давлат ёнғин назорати бош инспектори ва унинг ўринбосарларига маъмурий ҳуқуқбузарлик ишлари бўйича мансабдор шахсларга 25 БҲМгача жарима қўллаш ваколати берилди. Илгари ушбу кўрсаткич 20 БҲМни ташкил этган.

 

Бундан ташқари, Фавқулодда вазиятлар вазирлигига ёнғин билан боғлиқ фавқулодда ҳолатларнинг олдини олиш ҳамда аҳоли ҳаёти ва соғлиғига бевосита таҳдид туғдирувчи вазиятларда қонунчиликда белгиланган тартибда тадбиркорлик фаолиятини вақтинча тўхтатиш ҳуқуқи берилди.

 

Мазкур қонун расмий эълон қилинган кундан бошлаб уч ой ўтиб кучга киради.