Электр йўқотиши 20 фоиздан кўп бўлган 44 та туманнинг масъул раҳбарлари ишдан олинади
Ўзбекистонда электр йўқотишларини 2 карра камайтириш бўйича KPI белгиланади.
Президент Шавкат Мирзиёев раислигидаги видеоселектор йиғилишида электр йўқотиши 20 фоиздан кўп бўлган 44 та туман электр тармоқлари корхоналаридаги аҳвол танқид қилинди. Уларнинг хулоса қилмаган раҳбарларини бугуноқ ишдан олиш, ўрнига ёш кадрларни қўйиб, йўқотишларни 2 карра камайтириш бўйича КПИ белгилаб бериш зарурлиги қайд этилди.
Маълум қилинишича, бугунги кунда техника олийгоҳларида энергетика йўналишида 10 мингдан зиёд 3- ва 4-курс талабалари таълим олмоқда. Уларни техника хавфсизлигига ўқитиб, дуал таълим асосида туманга тушириш муҳим экани кўрсатиб ўтилди.
“Марҳамат, устозлари шогирдини туманга олиб борсин, ишни ўргатсин, йўқотишни камайтириш бўйича яхши ечимлар таклиф қилса, тежалган маблағни устоз ва талабага бонус қилиб берайлик”, – деди Президент.
Умуман, тармоқ раҳбарлари ва ҳокимлар бу йил 5 миллиард киловатт электр ва 3,5 миллиард куб метр газни тежаши шартлиги қайд этилди.
