Эронга нисбатан ядровий қурол ишлатилмайди — Трамп
АҚШ президенти зарур бўлган тақдирда анъанавий ҳарбий воситалар орқали мақсадларга эриша олишини таъкидлади.
АҚШ президенти Доналд Трамп Эронга қарши ядровий қурол қўллаш режалаштирилмаётганини маълум қилди. Бу ҳақда Reuters хабар берди.
Оқ уйда журналистлар билан мулоқот чоғида давлат раҳбари АҚШ зарур бўлган тақдирда анъанавий ҳарбий воситалар орқали мақсадларига эриша олишини таъкидлаган. Унинг сўзларига кўра, ядровий қурол қўллаш зарурати мавжуд эмас.
Шунингдек, Трамп ядровий қурол умуман қўлланмаслиги лозимлигини қайд этган ҳамда бу турдаги қуроллардан фойдаланишга қарши эканини билдирган.
АҚШ президенти Эрон билан боғлиқ вазият юзасидан фикр билдириб, сулҳ даврида Теҳрон маълум даражада ҳарбий салоҳиятини тиклашга уринганини айтган. Шу билан бирга, АҚШ қуролли кучлари қисқа муддатда жавоб чораларини кўришга қодир эканини таъкидлаган.
Эрон билан эҳтимолий келишув масаласига тўхталган Трамп, бу борада шошилмаслигини, узоқ муддатли ва барқарор натижа берадиган келишувга эришиш тарафдори эканини билдирган.
