“Олимбоевларга уйини қайтарамиз” — Санжар Каримов адвокати
Суд жараёнида мулк ва тезкор тадбирлар давомида айрим процессуал жиҳатлардаги қонунийлик масалалари муҳокама қилиниб, иш 27 апрелга қадар қолдирилди.
ЖИБ Мирзо Улуғбек туман судида Санжар Каримовга оид жиноят иши бўйича навбатдаги суд мажлиси бўлиб ўтди. Унда судланувчи ва унинг адвокатлари иштирок этиб, “Олимбоевлар иши” доирасида муҳокама марказида бўлган уй масаласига ҳам тўхталиб ўтилган.
Kun.uz маълумотларига кўра, суд жараёнида адвокатлар томонидан наркожиноят айблови юзасидан Санжар Каримовнинг уй-жойи ва офисида ўтказилган тезкор тадбирлар давомида айрим процессуал жиҳатлардаги қонунийлик масалалари кўтарилди. Шундан сўнг тезкор тадбирда иштирок этган ички ишлар органларининг жиноят қидирув бўлими ходимларининг кўрсатмалари тингланган.
Судланувчи Санжар Каримов суд жараёнида ўзига қўйилган айбловлар юзасидан изоҳ берар экан, отасида деменция касаллиги бўлгани сабабли айрим дори воситалари шифокор тавсияси билан қўлланилганини маълум қилган. У, шунингдек, топилган моддага алоқадорликни рад этиб, ушбу модда отасига тегишли бўлган кийимдан чиққанини билдирган ҳамда терговга тиббий ҳужжатлар тақдим этилганини қайд этган.
Шунингдек, судланувчи отаси вафотидан сўнг қисқа муддат давомида айрим моддаларни истеъмол қилганини тан олган, бироқ ҳеч қандай олди-сотди ҳолатлари бўлмаганини таъкидлаган.
Суд мажлиси якунида Санжар Каримов ва унинг ҳимоячилари “Олимбоевлар иши” бўйича муҳокама марказидаги уй масаласини эгаларига қайтаришини билдирган.
Суд томонидан 27 апрелга қадар танаффус қилинган.
