Саида Мирзиёева Самарқанддаги таъмирталаб объектларни кўздан кечирди
Президент администрацияси раҳбари жойлардаги ҳаққоний ҳолатни кўриш учун ҳудудга тез-тез келиб туришини билдирди.
Президент aдминистрацияси раҳбари Саида Мирзиёева Самарқанд вилоятига ташрифи давомида ҳудуддаги бир қатор инфратузилма лойиҳалари билан танишди
Маълум қилинишича, ташриф чоғида “Янги Ўзбекистон” массивини ривожлантириш ишлари кўздан кечирилган. Шунингдек, мусиқа мактаби каби таъмирга муҳтож объектлар ҳамда Геологлар маҳалласидаги болалар боғчаси ҳолати ўрганилган.
Қайд этилишича, мазкур боғча капитал таъмирдан ташқари, тубдан қайта қурилади ва реконструкциядан сўнг 600 нафаргача болани қабул қила оладиган, Самарқанддаги энг йирик мактабгача таълим муассасаларидан бирига айланиши кутилмоқда.
Ташриф якунида вилоят ва туманлар раҳбарияти билан учрашув ўтказилган.
Саида Мирзиёева таъкидлашича, ҳудудларда амалга оширилаётган ва режалаштирилган ўзгаришлар Шавкат Мирзиёев томонидан олиб борилаётган тизимли ислоҳотларнинг таркибий қисми ҳисобланади.
“Раҳбаримиз топшириқларининг жойлардаги ижросини таъминлашга жамоам билан бирга кўмаклашиш, ҳаққоний ҳолатни қоғозлардаги ҳисоботларда эмас, балки ўз кўзим билан кўриш учун ҳам бу ерга тез-тез келиб тураман”, — деди Саида Мирзиёева.
