Энди жарима майдончасидаги машинани онлайн чиқариш мумкин
Янги тартибга кўра, мурожаатлар автоматлаштирилган тизимда текширилиб, 1 иш кунида жавоб берилади.
Вазирлар Маҳкамасининг 2026 йил 28 апрелдаги 208-сонли қарорига мувофиқ, автомототранспорт воситаларини жарима майдончасидан олиб чиқиш бўйича Давлат йўл ҳаракати хавфсизлиги хизматига электрон тарзда мурожаат қилишнинг маъмурий регламенти тасдиқланди. Бу ҳақда Адлия вазирлиги хабар берди.
Ушбу тартибга кўра, автомототранспорт воситаларини жарима майдончасидан чиқариш бўйича давлат хизмати бир нечта қулай каналлар орқали амалга оширилади. Хусусан, фуқаролар Ягона интерактив давлат хизматлари портали (my.gov.uz), Давлат йўл ҳаракати хавфсизлиги хизматининг мобил иловаси ҳамда Давлат хизматлари марказлари орқали мурожаат қилиш имкониятига эга бўладилар.
Мурожаат қилувчи ЯИДХП ёки мобил илова орқали ариза юборганида, электрон шаклда сўровнома тўлдирилади ва ундаги маълумотларнинг тўғрилиги автоматлаштирилган тизим орқали текширилади.
Ваколатли орган томонидан мурожаат кўриб чиқиш жараёнида транспорт воситасининг жарима майдончасига жойлаштирилиш асослари, шунингдек, ушбу асосларнинг бартараф этилгани ёки маъмурий иш юзасидан қонуний қарор қабул қилинганлиги ўрганилади.
Агар барча талаблар бажарилганлиги тасдиқланса, мурожаат қилувчига бир иш куни ичида транспорт воситасини жарима майдончасидан олиб чиқишга рухсат берувчи электрон хабарнома юборилади.
