Тошкент вилоятида ўлик балиқларни каналга ташлаган компания 92 млн сўм жаримагa тортилди
Зангиота туманида балиқчилик хўжалигида кислород етишмаслиги оқибатида балиқлар нобуд бўлган.
Тошкент вилоятининг Зангиота туманида жойлашган балиқчилик хўжалигида содир бўлган экологик ҳолат юзасидан тегишли органлар томонидан текширув ўтказилди. Бу ҳақда Экология ва иқлим ўзгариши бўйича миллий қўмитанинг Давлат атроф-муҳитни назорат қилиш инспекцияси маълум қилди.
Ижтимоий тармоқларда тарқалган видеоларда Аччисой каналида балиқларнинг нобуд бўлаётгани акс этган. Мазкур ҳолат юзасидан ўтказилган тезкор ўрганишлар натижасида воқеа Зангиота тумани Иттифоқчи маҳалласида жойлашган “Дамачи Балиқ” МЧЖга тегишли сунъий сув ҳавзасида юзага келгани аниқланган.
Мутахассислар хулосасига кўра, сув сатҳининг пасайиши ва кислород етишмаслиги оқибатида 200–300 грамм оғирликдаги балиқлар нобуд бўлган. Шундан сўнг, ўлик балиқлар хўжалик ходими томонидан Аччисой каналига ташлаб юборилган.
Шунингдек, хўжалик фаолияти натижасида ҳосил бўлган оқава сувлар лаборатория таҳлилидан ўтказилганда, экологик меъёрлардан сезиларли даражада ошиб кетганлиги аниқланган. Жумладан, аммоний азот миқдори меъёрдан 1,7 баравар, нитрит азоти 1,95 баравар, қуруқ қолдиқ 1,28 баравар ва умумий фосфор 1,8 баравар юқори экани қайд этилган.
Мазкур ҳолат оқава сувларни етарли даражада тозаламаслик, сув ҳавзаларининг ифлосланиши ҳамда экологик мувозанатнинг бузилишига олиб келиши мумкинлиги таъкидланган.
Текширув якунларига кўра, корхонага 92 миллион сўмдан ортиқ миқдорда компенсация тўлаш мажбурияти юклатилган. Масъул шахсларга нисбатан маъмурий баённомалар расмийлаштирилди ҳамда бундай ҳолатларнинг такрорланишининг олдини олиш бўйича мажбурий кўрсатмалар берилган.
Шунингдек, Аччисой канали ўлик балиқлардан тозаланган.
