Германия Ўзбекистонга “яшил” иқтисодиёт учун 9 млн евро ажратади
Лойиҳада ҳудудий ривожланиш бўйича мастер-режалар ишлаб чиқиш, “яшил” пилот лойиҳаларни амалга ошириш ҳам назарда тутилган.
Ўзбекистонда ҳудудларни барқарор ривожлантириш ва “яшил” иқтисодиётни рағбатлантириш мақсадида Германия билан янги грант келишуви имзоланди. Бу ҳақда ЎзА хабар берди.
Келишувга кўра, ҳудудий ривожланиш бўйича мастер-режалар ишлаб чиқиш ва “яшил” пилот лойиҳаларни амалга ошириш учун 9 миллион евро маблағ жалб этилади.
Ўзбекистон Иқтисодиёт ва молия вазирлиги ҳамда Германия халқаро ҳамкорлик жамияти (ГИЗ)нинг Ўзбекистондаги ваколатхонаси иштирокида ўтказилган учрашувда томонлар мазкур битимга эришди.
Музокаралар давомида илгари амалга оширилган лойиҳалар натижалари таҳлил қилиниб, келгусидаги устувор йўналишлар белгилаб олинди.
Қайд этилишича, аввал ажратилган грант маблағлари ҳисобидан 12 та туман учун комплекс ривожланиш мастер-режалари ишлаб чиқилган ҳамда 24 та пилот лойиҳа ижобий баҳоланган. Жумладан, Шаҳрисабз туманида 500 гектар майдонда агротуризм мажмуаси ташкил этилди, бир қатор ҳудудларда касбга ўқитиш марказлари ишга туширилган.
Шунингдек, интенсив балиқчилик лойиҳалари йўлга қўйилиб, ижтимоий объектларда энергия тежовчи технологиялар жорий этилди, IT ва ҳунармандчилик марказлари ташкил этилди. Ушбу йўналишларга жами 1,3 миллион евро грант маблағлари йўналтирилган.
Янги келишувга мувофиқ, 2026–2029 йилларда мазкур ишлар кенгайтирилади. Хусусан, мастер-режаларни ишлаб чиқишда сунъий интеллект ва инновацион таҳлил усулларидан фойдаланиш, мавжуд режалар асосида “яшил” пилот лойиҳаларни кўпайтириш режалаштирилган.
Вазирлик ахборот хизматига кўра, Бахмал, Бойсун ва Сўх туманларида ҳам янги ташаббуслар амалга оширилади. Лойиҳалар самарадорлигини ошириш мақсадида маҳаллий ва хорижий экспертлар жалб қилиниб, мутахассислар малакасини оширишга қаратилган ўқув дастурлари, семинар ва тренинглар ташкил этилиши кўзда тутилган.
