1 августдан саноат ва ядровий хавфсизлик қоидабузарликлари ҳақида хабар берган фуқаролар мукофотланади
Ҳуқуқбузарликни фото ёки видео билан тасдиқлаган шахс жариманинг 20 фоизини олади.
Ўзбекистонда саноат, радиация ва ядровий хавфсизлик қоидаларига риоя этилишини кучайтириш ҳамда ҳуқуқбузарликларнинг олдини олишга қаратилган янги тартиб жорий этилмоқда. Бу ҳақда Адлия вазирлиги хабар берди.
Ҳукуматнинг тегишли қарорига мувофиқ, 2026 йил 1 августдан бошлаб хавфли ишлаб чиқариш объектлари ва техник қурилмалардан фойдаланишда аниқланган қоидабузарликлар ҳақида фото ва (ёки) видео материаллар тақдим этган фуқаролар рағбатлантирилади.
Белгиланган тартибга кўра, тақдим этиладиган материалларда ҳуқуқбузарликнинг моҳияти, содир этилган жой (геолокация), сана ва вақт аниқ акс этган бўлиши лозим. Ахборот тизими орқали келиб тушган материаллар ҳамда “E-ma‘muriy ish” учун зарур маълумотлар тўплами Қўмитанинг ҳудудий бошқармаси (бўлими) масъул ходими томонидан 3 иш куни мобайнида жойига чиққан ҳолда кўриб чиқилади.
Ўрганиш натижасида аниқланган ҳуқуқбузарликлар юзасидан маъмурий иш қўзғатилади ҳамда қонунчиликка мувофиқ чоралар кўрилади.
Шунингдек, ҳуқуқбузарлик ҳақида асосли маълумот тақдим этган шахс ундирилган жариманинг Қўмитага ўтказилган қисмининг 20 фоизи миқдорида пул мукофоти билан рағбатлантирилади.
