Италия бош вазири сунъий интеллект нишонига айланди

Италия бош вазири Жоржа Мелони интернетда унинг сунъий интеллект ёрдамида яратилган сохта фотосурати тарқатилганини кескин қоралади ва бундай технологиялар сиёсий ва шахсий ҳужум воситасига айланаётганидан огоҳлантирди. Бу ҳақда AP хабар берди.

 

Мазкур тасвирда Мелони ётоқда, ички кийимда тасвирланган бўлиб, у ижтимоий тармоқларда кенг тарқалган. Бош вазир ушбу фотосуратни ўзининг Facebook саҳифасида улашиб, унинг қандай тарқалганига эътибор қаратди. Унга кўра, расм “Роберто” исмли фойдаланувчи томонидан тарқатилган ва постда Мелони “уялиши керак”лиги ҳақида изоҳ қолдирилган.

 

Мелони фуқароларни ижтимоий тармоқларда тарқаладиган контентга эҳтиёткорлик билан ёндашишга чақирди ва уни текширмасдан тарқатмаслик зарурлигини таъкидлади.

 

“Deepfake — бу жуда хавфли восита, чунки у одамларни алдаши, манипуляция қилиши ва исталган шахсни нишонга олиши мумкин. Мен ўзимни ҳимоя қила оламан, бироқ кўпчилик бунга қодир эмас,” — деди у Facebook'даги баёнотида.

 

Бош вазир ушбу ҳолат бўйича ҳуқуқ-тартибот органларига мурожаат қилиш-қилмаслик масаласи ҳали кўриб чиқилаётганини билдирди. Шу билан бирга, у баъзи изоҳларда ҳазил оҳангида, сохта тасвир “уни янада чиройли кўрсатганини” ҳам қайд этди.

 

“Бироқ ҳақиқат шуки, одамлар энди ҳужум қилиш ва ёлғон тарқатиш учун мутлақо ҳар қандай воситадан фойдаланмоқда,” — дея қўшимча қилди Мелони.

 

Бу Мелони билан боғлиқ биринчи шундай ҳолат эмас. Жорий йил бошида ҳам Римдаги бир диний иншоотда пайдо бўлган фаришта ҳайкали унинг ташқи кўринишига ўхшатилгани ижтимоий тармоқларда кенг муҳокамага сабаб бўлган эди.

 

Ўшанда ҳам бош вазир вазиятга ҳазил билан муносабат билдирган ва ўзини “фариштага ўхшатиш нотўғри”лигини айтган эди.