Ўзбекистонда “Оиламиз — келажагимиз” ойлиги ўтказилмоқда
Ойлик доирасида бир қатор йўналишларда оилалар “Ибратли оила” кўкрак нишони билан тақдирланади.
Ўзбекистонда 15 май — Халқаро оила куни муносабати билан “Оиламиз — келажагимиз” ойлиги бошланди.
Маълум қилинишича, Вазирлар Маҳкамасининг қарорига мувофиқ, май ойи давомида оила институтини мустаҳкамлаш, миллий асраб-авайлаш ва ёшларни масъулиятли оилавий ҳаётга тайёрлашга қаратилган тадбирлар ўтказилади.
Ойлик доирасида фаровон ва аҳил оилалар тажрибасини оммалаштириш, ёшлар орасида соғлом оила тушунчасини шакллантириш ҳамда оилаларда ўзаро ҳурмат ва меҳр-оқибат муҳитини мустаҳкамлаш асосий мақсад этиб белгиланган.
Шунингдек, “Янги Ўзбекистоннинг ибратли оиласи”, “Энг намунали ёш оила” ва “Ибратли ҳарбий оилалар” каби кўрик-танловлар ташкил этилиши режалаштирилган. Намунали оилалар “Ибратли оила” кўкрак нишони билан тақдирланади. 2025 йилда мазкур мукофотга 2 мингта оила сазовор бўлган.
Бундан ташқари, “Янги Ўзбекистонда фаровон оила модели” мавзусида халқаро илмий-амалий конференция ҳам ўтказилади.
Ойлик доирасида оилавий ажримларнинг олдини олиш, ёш оилаларни қўллаб-қувватлаш, аҳолига психологик ва ҳуқуқий маслаҳатлар бериш бўйича ҳам амалий тадбирлар ташкил этилади.
Шу билан бирга, соғлом турмуш тарзини тарғиб қилиш мақсадида спорт мусобақалари, марафонлар, шахмат ва стол тенниси бўйича беллашувлар ҳам ўтказилиши кўзда тутилган.
