Ким Чен Инга суиқасд қилинса, Шимолий Корея автоматик ядровий зарба беради

Шимолий Корея етакчиси Ким Чен Ин мамлакат конституциясига ўзгартириш киритиб, ўзига суиқасд уюштирилган тақдирда автоматик ядровий жавоб зарбаси берилишини назарда тутувчи янги тартибни жорий этди. Бу ҳақда Daily Mail хабар берди.

 

Маълум қилинишича, ўзгартиришлар 15-чақириқ Олий халқ мажлисининг Пхенянда бўлиб ўтган сессиясида қабул қилинган. Янги тартибга кўра, агар Шимолий Корея раҳбари ҳалок бўлса ёки қуролли кучларни бошқариш имкониятидан маҳрум этилса, мамлакат ядровий тизими “автоматик ва зудлик билан” жавоб зарбасини амалга ошириши мумкин.

 

Таҳлилчиларга кўра, Пхеняннинг бу қарори АҚШ ва Исроилнинг Эронга берган зарбалари ҳамда Эрон олий раҳнамоси Али Хоманаий атрофидаги юқори мартабали шахслар нишонга олингани фонида қабул қилинган. Экспертлар Шимолий Корея раҳбарияти Теҳрондаги воқеаларни ўз хавфсизлиги учун жиддий сигнал сифатида баҳолаганини таъкидламоқда.

 

Сеулдаги Kookmin University профессори Андрей Ланковнинг фикрича, Пхенян Эрон раҳбариятига қарши амалга оширилган тезкор ва аниқ ҳужумларни диққат билан кузатган. Унга кўра, Шимолий Корея урушнинг илк босқичидаёқ давлат раҳбари йўқ қилинган ҳолатда ҳам жавоб зарбаси бериш имкониятини сақлаб қолишга уринмоқда.

 

Экспертлар Ким Жонг Уннинг хавфсизлик масаласига алоҳида эътибор қаратишини ҳам эслатмоқда. Шимолий Корея етакчиси одатда кучайтирилган қўриқлов остида ҳаракатланади, сафарларида эса зирҳли махсус поезддан фойдаланади.

 

Шунингдек, таҳлилчилар Шимолий Кореянинг ташқи дунёдан яккаланганлиги сабабли мамлакат ичида разведка операцияларини амалга ошириш Эрондагига қараганда анча мураккаб бўлишини қайд этмоқда. Мамлакатдаги қатъий назорат тизими, ёпиқ чегаралар ва чекланган алоқа инфратузилмаси бунга асосий омил сифатида кўрилмоқда.

 

Хабарлар фонида Шимолий Корея Жанубий Корея чегараси яқинига янги турдаги узоқ масофали артиллерия тизимларини жойлаштириш режасини ҳам эълон қилди. Корея Марказий янгиликлар агентлиги маълумотига кўра, Ким Жонг Ун янги 155 миллиметрлик ўзиюрар гаубица ишлаб чиқарилаётган ҳарбий заводга ташриф буюрган.

 

Давлат ОАВлари ушбу артиллерия тизимининг зарба масофаси 37 милдан ортиқлигини ва йил охиридан бошлаб фронт ҳудудларидаги бўлинмаларга етказиб берилиши режалаштирилганини билдирди. Таҳлилчиларга кўра, бундай қуроллар Сеул ва унинг атрофидаги зич аҳоли яшайдиган ҳудудларни нишонга олиш имконини беради.