Фарғонада эрини калтаклаган аёл жаримага тортилди

 

Фарғона шаҳрида турмуш ўртоғига тан жароҳати етказган аёл оилавий зўравонликда айбли деб топилди. Zamon.uz суд ҳужжатлари билан танишди.

 

Маълум қилинишича, 1999 йилда туғилган M.A. 2026 йил 20 февраль куни турмуш ўртоғи билан оилавий келишмовчилик сабаб жанжаллашган. Жанжал вақтида аёл эри M.С.гa қўли билан уриб, тан жароҳати етказган.

 

Судда аёл айбига иқрорлик билдирган. Унинг кўрсатмасига кўра, аввалроқ фарзандларини айлантириш масаласида эр-хотин ўртасида тортишув юзага келган. Орадан икки кун ўтиб можаро яна давом этган ва навбатдаги жанжал вақтида у ўзини ҳимоя қилиш мақсадида турмуш ўртоғини итариб юборганини билдирган.

 

Жабрланувчи эркак эса суддан аёлга нисбатан қонуний чора кўришни сўраган ҳамда уни кечирмаслигини маълум қилган.

 

ЖИБ Фарғона шаҳар суди ҳукмига кўра, M.A. Жиноят кодексининг 126-1-моддаси 2-қисмида назарда тутилган оилавий зўравонлик жиноятини содир этганликда айбли деб топилган. Унга БҲМнинг 20 баравари — 8 миллион 240 минг сўм миқдорида жарима жазоси тайинланган.

 

Шунингдек, жабрланувчига моддий ва маънавий зарар ундириш масаласида фуқаролик судига мурожаат қилиш ҳуқуқи тушунтирилган.