АҚШ–Эрон музокараларининг янги босқичи 5 июнь куни ўтказилиши режалаштирилмоқда
Дастлабки келишув “Исломобод декларацияси” номи билан эълон қилиниши мумкин.
Al-Hadath телеканали хабарига кўра, АҚШ ва Эрон ўртасидаги навбатдаги музокаралар жорий йилнинг 5 июнь куни бўлиб ўтиши кутилмоқда. Мазкур маълумот телеканал томонидан музокаралар жараёнидан хабардор манбаларга таяниб эълон қилинган.
Қайд этилишича, Вашингтон ва Теҳрон ўртасида дастлаб ўзаро англашув меморандумини имзолаш масаласи муҳокама қилинмоқда. Манбаларга кўра, ушбу ҳужжат томонлар ўртасидаги якуний келишувга эришиш йўлидаги муҳим босқич сифатида баҳоланмоқда.
Шунингдек, меморандум имзолангач, томонлар можаро ва қарама-қарши масалаларни тўлиқ ҳал этишга қаратилган батафсил музокараларга ўтиши режалаштирилгани айтилмоқда. Дастлабки ҳужжат “Исломобод декларацияси” номи билан эълон қилиниши мумкинлиги ҳам маълум қилинган.
Манбаларнинг таъкидлашича, музокараларда воситачи сифатида фаол қатнашаётган Покистон меморандумни асосий томонлар иштирокисиз ҳам эълон қилиши эҳтимолдан холи эмас.
Шунингдек, АҚШ ва Эрон якуний келишув бўйича тўлиқ музокаралар бошланиши билан ўз делегацияларининг юқори даражадаги раҳбарларини жараёнга жалб қилиши кутилмоқда.
