Огоҳлантиришга қарамай “рул” га ўтирган 238 нафар битирувчи ушланди
Айрим вилоятларда битирув тадбирига автомобиль бошқариб келган қизлар ҳам аниқланган.
Йўл ҳаракати хавфсизлиги хизмати “Сўнгги қўнғироқ” тадбирлари куни мактаб ўқувчилари томонидан автомашиналардан ноқонуний фойдаланиш билан боғлиқ 238 та ҳолат аниқланганини маълум қилди.
ЙҲХБ матбуот котиби Зойир Йўлдошовнинг билдиришича, 25 май куни эрталаб соат 07:00 дан 14:00 гача олиб борилган назорат тадбирлари давомида бир қатор ўқувчилар мактабларга автомобиль бошқариб келгани қайд этилган.
Қайд этилишича, тарғибот ва огоҳлантириш ишлари олиб борилганига қарамасдан, ўқувчиларнинг ота-онасига тегишли ёки ижарага олинган автомашиналарни бошқариб келиш ҳолатлари кузатилган. Аниқланган қоидабузарлар орасида 11- ва 9-синф ўқувчилари билан бир қаторда ҳатто 8-синф ўқувчилари ҳам бўлгани маълум қилинган.
Шунингдек, Хоразм вилоятида битирув тадбирига автомобиль бошқариб келган қизлар ҳам аниқлангани билдирилган.
“Байрам тадбирларини кўнгилсиз ҳодисаларсиз ўтказиш мақсадида минглаб йўл-патруль хизмати ҳамда ички ишлар органлари ходимлари мактаблар атрофида кучайтирилган тартибда хизмат олиб бормоқда”, дейилади ЙҲХБ ахборотида.
Масъуллар ота-оналарни фарзандлари ҳаёти ва хавфсизлигига бефарқ бўлмасликка, вояга етмаганларнинг автомобиль бошқаришига йўл қўймасликка чақирди. Назорат тадбирлари давом этаётгани маълум қилинди.
