Тошкентдаги мактабда ўқувчини урган ўқитувчига оид жиноят иши тугатилди
ИИВ ҳолат юзасидан қўшимча расмий маълумот тақдим этилишини билдирди.
Тошкент шаҳрининг Мирзо Улуғбек туманидаги 275-сонли мактабда юз берган можаро юзасидан ўқитувчига нисбатан қўзғатилган жиноят иши бўйича тергов ҳаракатлари якунланди. Бу ҳақда Ички ишлар вазирлиги матбуот котиби Шоҳруҳ Ғиёсов маълум қилди.
Қайд этилишича, воқеа жорий йилнинг 19 май куни содир бўлган. Мактабнинг информатика фани ўқитувчиси ҳамда 9-синф ўқувчиси ўртасида дарс жараёнида тортишув келиб чиққан. Дастлабки маълумотларга кўра, ўқувчи ўқитувчи томонидан берилган кўрсатмаларни бажармаган ҳамда дарс жараёнига халақит берган. Шундан сўнг улар ўртасида жанжал юзага келган.
Мазкур ҳолат юзасидан Мирзо Улуғбек тумани ИИО ФМБ ҳузуридаги Тергов бўлими томонидан ўқитувчига нисбатан Жиноят кодексининг 105-моддаси — “Қасддан баданга ўртача оғир шикаст етказиш” моддаси билан жиноят иши қўзғатилган эди.
25 май куни эса ушбу жиноят иши бўйича тергов ҳаракатлари якунлангани маълум қилинди. Ички ишлар вазирлиги ҳолат юзасидан яқин кунларда қўшимча расмий маълумот тақдим этилишини билдирди.
