Эрон президенти истеъфога чиқадими?
Мамлакат расмийлари Масуд Пезешкианнинг истеъфоси ҳақида тарқалган хабарларга изоҳ берди.
Эрон президенти Масуд Пезешкианнинг истеъфога чиқиши ҳақида тарқалган хабарлар расмий равишда рад этилди.
Эрон президенти маъмурияти коммуникациялар бўлими бошлиғи ўринбосари Меҳди Табатабаий ижтимоий тармоқлардаги баёнотида ушбу маълумотларни “асоссиз миш-мишлар” деб атади.
Унинг таъкидлашича, айрим хорижий оммавий ахборот воситаларида тарқалган хабарлар ҳақиқатга зид бўлиб, уларни сиёсий мақсадларда тарқатилган дезинформация сифатида баҳолаш мумкин.
“Бу каби хабарлар шармандали хорижий тармоқларнинг ғийбатларига асосланган. Улар ҳақиқатни эмас, балки ўз истакларини эълон қилмоқда. Президент халқига хизмат қилишни давом эттиради”, — деган Табатабаий.
Шунингдек, Эрон ҳукумати ахборот сиёсати кенгаши раиси Элиас Ҳазрати ҳам Пезешкианнинг истеъфоси ҳақидаги маълумотларни рад этиб, уларнинг асоссиз эканини тасдиқлаган.
Маълумот учун, аввалроқ айрим хорижий медиа манбаларида президент Пезешкиан Олий раҳбариятга истеъфо хати юборгани ҳақида хабарлар тарқалган эди. Бироқ Эрон расмийлари бу даъволарни инкор этган.
