БМТ банкротлик ёқасида, маблағлар августда тугаши мумкин — WSJ
АҚШ ва Хитой томонидан бадал тўловларининг кечиктирилиши сабабли БМТ жиддий молиявий инқирозга дуч келган.
Бирлашган Миллатлар Ташкилоти (БМТ) АҚШ ва Хитой томонидан мажбурий бадал тўловларининг кечиктирилиши фонида жиддий молиявий қийинчиликларга дуч келмоқда. Бу ҳақда The Wall Street Journal нашри хабар берди.
Маълумотларга кўра, АҚШ ва Хитой ҳиссаси БМТ умумий бюджети даромадларининг қарийб 42 фоизини ташкил этади. Ҳозирда АҚШнинг ташкилот олдидаги қарзи 4 миллиард доллардан ошган бўлса, Хитой май ойида 850 миллион доллар тўлаганига қарамай, яна 455 миллион доллар қарздор бўлиб қолмоқда.
Нашрнинг ёзишича, молиялаштиришдаги узилишлар сабаб БМТ харажатларни кескин қисқартириш чораларини кўрмоқда. Хусусан, ташкилот котибиятидаги 3 мингга яқин лавозим қисқартирилган, айрим офислар ёпилган ҳамда бир қатор маъмурий харажатлар камайтирилган.
Шунингдек, Буюк Британия, Германия, Швеция ва Нидерландия каби йирик донор давлатлар ҳам халқаро гуманитар дастурларга ажратилаётган маблағларни қисқартиргани қайд этилган.
БМТ Бош котиби Антонио Гутерриш аввалроқ ташкилот “молиявий қулашнинг реал хавфи”га дуч келаётганини таъкидлаган эди. Прогнозларга кўра, мавжуд маблағлар август ойининг ўрталарига қадар етиши мумкин.
Молиявий танқислик фонида БМТ тинчликпарварлик операцияларига сарфланаётган харажатларни камайтириш, айрим миссиялар фаолиятини қайта кўриб чиқиш ва қўшин юборувчи давлатларга тўловларни кечиктиришга ҳам мажбур бўлмоқда.
