“Бошланғич таълим она тилида бўлиши керак” — Алишер Қодиров

 

Алишер Қодиров мактабгача тайёрлов курслари ҳамда мактабнинг бошланғич синфларида таълимни она тилидан бошқа тилда олиб бориш масаласига муносабат билдирди. Бу ҳақда у ўзининг ижтимоий тармоқлардаги саҳифасида ёзган.

 

Унинг таъкидлашича, бошланғич таълим босқичида она тилидан бошқа тилда ўқитиш болалар манфаатига зид бўлиб, бу ҳолатни педагогик хато ҳамда миллий ўзликка таъсир қилувчи омил сифатида баҳолаш мумкин. 

 

Қодировнинг қайд этишича, амалдаги тартибга кўра ота-оналар таълим тилини танлаш ҳуқуқига эга бўлса-да, айрим ҳолларда бу болаларнинг бошланғич таълимни ўз она тилида олиш имкониятини чекламоқда.

 

Шунингдек, у бошланғич таълимда бошқа тилда ўқиган болаларда кейинги босқичларда ўқув жараёнини давом эттиришда қийинчиликлар юзага келиши, бу эса билимларни ўзлаштириш даражасига салбий таъсир кўрсатиши мумкинлигини таъкидлаган.

 

Қодировнинг фикрича, бошланғич таълим ва тайёрлов курслари тўлиқ она тилида ташкил этилиши зарур. У бу масалани қонунчилик даражасида тартибга солиш ва Таълим тўғрисидаги қонунга тегишли ўзгартиришлар киритиш лозимлигини қайд этди.

 

“Бошқа миллатли ватандошларимизга талаб билан шу шароитни яратиб бериш керак. Бошқа миллатли ватандошларимиз агар бошланғич таълимни ўзим она тилимда оламан деса, нур устига аъло нур” — дея таъкидлаган Қодиров.