Сурхондарёдаги сув омборида қайиқ ағдарилиб, бир киши чўкиб кетди
Қайиқдаги 5 нафар фуқародан 4 нафари қирғоққа сузиб чиққан.
Сурхондарё вилоятининг Қумқўрғон туманида жойлашган Жанубий Сурхон сув омборида қайиқ ағдарилиб кетиши оқибатида бир киши сувда бедарак йўқолган. Бу ҳақда вилоят Фавқулодда вазиятлар бошқармаси хабар берди.
Маълум қилинишича, 2026 йил 1 июнь куни соат 17:30 ларда Сурхондарё вилояти ФВБга Қумқўрғон туманида жойлашган Жанубий Сурхон сув омборида қайиқ ағдарилиб кетгани ҳақида хабар келиб тушган.
Воқеа жойига етиб борган қутқарувчилар қайиқдаги 5 нафар фуқародан 4 нафари қирғоққа сузиб чиққанини аниқлаган, 1 нафари эса сувдан чиқолмай қолиб чўкиб кетганлиги маълум бўлган.
Ҳозирда Фавқулодда вазиятлар бошқармаси қутқарувчилари томонидан сув ҳавзасида кенг кўламли қидирув-қутқарув ишлари олиб борилмоқда.
Ҳодиса юзасидан Қумқўрғон тумани прокуратураси, ички ишлар ва фавқулодда вазиятлар органлари ходимлари томонидан ҳолатнинг келиб чиқиш сабаблари ўрганилмоқда.
