Фарғонада фермер хўжалиги сув ҳавзасида бир киши чўкиб кетди
Мембранали қопламали сув ҳавзалари атрофи махсус панжаралар билан ўралиши, фавқулодда ҳолатларда фойдаланиш учун қутқарув арқонлари ўрнатилиши таъкидланди.
Фарғона вилоятининг Бағдод туманида жойлашган фермер хўжалигидаги сув ҳавзасида бир киши чўкиб кетди. Бу ҳақда Фавқулодда вазиятлар вазирлиги маълум қилди.
Маълум қилинишича, ҳодиса 3 июнь куни содир бўлган. Фуқаро мембранали қопламали сув ҳавзасида чўкиб ҳалок бўлган.
ФВВга кўра, аввалги йилларда ҳам шу турдаги сув ҳавзаларида бир неча бор чўкиш ҳолатлари қайд этилган. Шу муносабат билан вазирлик мутахассислари бундай сув резервуарларидан фойдаланишда хавфсизлик талабларига қатъий риоя қилиш зарурлигини эслатди.
Таъкидланишича, мембранали қопламали сув ҳавзалари атрофи махсус панжаралар билан ўралиши, шунингдек, фавқулодда ҳолатларда фойдаланиш учун қутқарув арқонлари ўрнатилиши лозим.
Фавқулодда вазиятлар вазирлиги фуқароларни ҳушёр бўлишга ҳамда сув ҳавзалари яқинида хавфсизлик қоидаларига амал қилишга чақирди.
