Ўзбекистон Афғонистонга 40 тонна қишлоқ хўжалиги уруғликларини етказиб берди
Шунингдек, 500 килограмм сабзавот ҳамда полиз экинлари уруғликлари топширилган.
Ўзбекистон Қишлоқ хўжалиги вазирлиги ҳузуридаги Уруғчиликни ривожлантириш маркази томонидан Афғонистон фермерлари ва аграр тузилмаларига беғараз ёрдам тариқасида қишлоқ хўжалиги экинлари уруғликлари етказиб берилди. Бу ҳақда Қишлоқ хўжалиги вазирли хабар берди.
Ёрдам доирасида об-ҳаво шароитларига мослашган ва сертификатланган 20 тонна чигит ҳамда 20 тонна шоли уруғлиги, шунингдек, 500 килограмм сабзавот ва полиз экинларининг юқори сифатли, сараланган уруғлари топширилган.
Мутахассислар ушбу амалий ёрдам Афғонистонда озиқ-овқат хавфсизлигини мустаҳкамлаш, қишлоқ жойларда аҳоли бандлигини ошириш ҳамда замонавий агротехнологияларни жорий этишга хизмат қилишини таъкидлашмоқда.
Қайд этилишича, Ўзбекистон ва Афғонистон ўртасидаги аграр ҳамкорлик изчил ривожланиб, минтақавий барқарорлик, озиқ-овқат хавфсизлиги ва иқтисодий тараққиётни таъминлашга муносиб ҳисса қўшмоқда.
