Америкалик журналист Хитой агенти бўлиб чиқди

АҚШ фуқароси ва журналист Томас Вейр Паукен II Хитой Халқ Республикаси манфаатлари йўлида ноқонуний агент сифатида фаолият юритганини тан олди. Бу ҳақда АҚШ Адлия вазирлигига таяниб, BBC хабар берди.

 

Расмий маълумотларга кўра, 50 ёшли Паукен АҚШ ҳукуматидан махфий маълумотларни олишга қаратилган фитнада иштирок этганини судда тан олган. Унга кўра, журналист камида 2019 йилдан 2026 йил февралигача Хитой ҳукумати билан боғлиқ шахсларнинг топшириғи ва назорати остида ишлаган.

 

Суд ҳужжатларида қайд этилишича, Паукен 2010 йилдан буён Хитойда яшаб келган ҳамда CCTV ва Xinhua News каби давлат ОАВларида фаолият юритган. Тергов материалларига кўра, у “Кети” номи билан танилган шахсдан топшириқлар олиб, АҚШдаги потенциал ахборот манбалари билан учрашувлар ташкил этган.

 

АҚШ Адлия вазирлиги маълумотига кўра, Паукен ушбу фаолияти учун камида 100 минг доллар олган. Шунингдек, унга бир неча бор АҚШга сафар қилиб, Хитойга фойдали бўлиши мумкин бўлган маълумотларни йиғиш вазифаси юклатилган.

 

АҚШ Федерал қидирув бюроси (ФҚБ) вакиллари журналист америкалик шахслар ҳақида маълумот тўплаб, уларни Хитойдаги алоқадор шахсларга етказиб турганини билдирди. Тергов давомида унинг Хитойдаги яна икки ҳамкори билан ишлагани ҳам аниқланган.

 

Суд материалларига кўра, Паукен Ухандаги бир гуруҳ шахсларга АҚШ Адлия вазирлиги ва технологиялар соҳасига оид маълумотларни ҳам тақдим этган. 

 

Мазкур гуруҳ ундан кибержосуслик фаолияти учун мутахассис топишда ёрдам беришни сўраган.

 

Журналистнинг адвокати Чарлз Бернҳем эса мижози ўз ҳаракатлари учун масъулиятни тан олганини ва унинг мақсади Хитой билан тинч муносабатларни ривожлантириш ҳамда диний эркинликларни қўллаб-қувватлаш бўлганини таъкидлади.

 

Томас Вейр Паукен II бўйича ҳукм 1-сентабр куни эълон қилиниши кутилмоқда. У айбдор деб топилса, 10 йилгача озодликдан маҳрум этилиши мумкин