Ким Чен Ин Шимолий Кореянинг ядровий салоҳиятини кенгайтиришини эълон қилди

 

Шимолий Корея етакчиси Ким Чен Ин мамлакатнинг ҳарбий ядровий салоҳиятини янада ривожлантириш ва кенгайтириш бўйича саъй-ҳаракатлар кучайтирилаётганини маълум қилди. Бу ҳақда Корея Марказий ахборот агентлиги (КCNА) хабар берди.

 

Хабарга кўра, Ким Чен Ин янги ядровий материаллар ишлаб чиқариш корхонасига ташриф давомида ишлаб чиқариш жараёнлари, самарадорлик кўрсаткичлари ва истиқболдаги ривожланиш режаларини кўздан кечирган. Ташриф чоғида у мамлакатнинг ядровий қудратини “босқичма-босқич эмас, балки экспоненциал суръатда” ошириш зарурлигини таъкидлаган.

 

Унинг айтишича, тегишли дастур ишлаб чиқариш ҳажмини кенгайтириш ва ядровий арсенални оширишни ўз ичига олади. Ким Чен Ин, шунингдек, ядровий материаллар ишлаб чиқариш салоҳиятини янада кучайтириш ва мавжуд имкониятларни кенгайтириш бўйича аниқ вазифаларни белгилаб берган.

 

КCNА маълумотида қайд этилишича, Шимолий Корея раҳбари қурол даражасидаги ядровий материаллар ишлаб чиқариш қуввати сўнгги йилларда сезиларли даражада ошганини, жумладан, сўнгги беш йил ичида бу кўрсаткич икки баравар кўпайганини таъкидлаган.

 

Шунингдек, мамлакатда ядровий материаллар ишлаб чиқариш суръатлари тезлашгани ва бу жараён доирасида янги технологиялар жорий этилаётгани билдирилган.

 

Стокголм халқаро тинчлик тадқиқотлари институти (SIPRI) маълумотларига кўра, 2025 йил январ ҳолатида Шимолий Кореяда тахминан 50 та ядровий каллак мавжуд бўлиб, яна 40 тагача ядровий қурилма ишлаб чиқариш учун етарли бўлинувчи материаллар мавжуд.

 

КCНА хабарида қайд этилишича, Ким Чен Ин мамлакат ядровий қуроллар сонини оширишни давом эттириш ва ушбу йўналишдаги ишлаб чиқаришни кенгайтириш бўйича топшириқ берган.