Тошкентда Ўзбекистон ҳарбий санъати тарихи давлат музейи ташкил этилади
Музей 3 минг йилдан ортиқ давлатчилик тарихи давомида шаклланган ҳарбий анъаналар, саркардалар маҳорати, миллий Қуролли кучларнинг барпо этилиши ва ривожланиш босқичларини кенг ёритишга хизмат қилади.
Вазирлар Маҳкамасининг 3 июндаги қарорига мувофиқ, Қуролли кучлар давлат музейи негизида Ўзбекистон ҳарбий санъати тарихи давлат музейи ташкил этилади.
Ҳужжатга кўра, янги музей Ўзбекистоннинг 3 минг йилдан ортиқ давлатчилик тарихи давомида шаклланган ҳарбий анъаналар, саркардалар маҳорати, миллий Қуролли кучларнинг барпо этилиши ва ривожланиш босқичларини кенг ёритишга хизмат қилади.
Музей шунингдек, мамлакатда ҳарбий соҳада амалга оширилаётган ислоҳотларни кенг жамоатчиликка, хусусан ёш авлод ва халқаро аудиторияга етказиш мақсадида ташкил этилмоқда.
Лойиҳани амалга оширишда Мудофаа вазирлиги Маданият вазирлиги, Маданий мерос агентлиги, Фанлар академияси Тарих институти ҳамда Ўзбекистон Бадиий академияси билан ҳамкорликда иш олиб боради. Экспозицияларни яратишда етакчи ижодкорлар ва мутахассислар жалб этилади.
Қайд этилишича, музейнинг меъморий ечими миллий услуб ва анъаналарга мос ҳолда ишлаб чиқилади. Экспозициялар эса замонавий интерактив технологиялар, инновацион ёндашувлар ва сунъий интеллект имкониятлари асосида яратилади.
