Германияда ўзбекистонликлар учун ноқонуний Шенген визалари олиб беришда гумонланган гуруҳ фош этилди

Германияда Ўзбекистон фуқаролари учун ноқонуний равишда Шенген визаларини расмийлаштириб берганликда гумон қилинаётган халқаро гуруҳга қарши кенг кўламли махсус операция ўтказилди. Бу ҳақда Die Zeit хабар берди.

 

Маълум қилинишича, тергов доирасида чет элликларни ноқонуний олиб кириш, мамлакатда ноқонуний яшашни ташкил этиш, виза олишда фирибгарлик ҳамда ҳужжатларни қалбакилаштириш ҳолатлари ўрганилмоқда.

 

Тергов ҳаракатлари доирасида Германиянинг Ҳессен ва Қуйи Саксония федерал ерларидаги еттита манзилда тинтув ўтказилган. Операцияга қарийб 220 нафар федерал полиция ходими жалб этилган.

 

Прокуратура маълумотига кўра, тергов марказида асосан Ўзбекистон фуқароларидан иборат бўлган ва халқаро миқёсда фаолият юритган гуруҳ турибди. 

 

Тинтувлар давомида 12 нафар гумонланувчи аниқланган, шунингдек, Германияда ноқонуний яшаётган яна 9 нафар шахс текширувга олинган.

 

Дастлабки маълумотларга кўра, гумонланувчилар Европада иш излаётган Ўзбекистон фуқаролари учун қисқа муддатли Шенген визаларини расмийлаштириб берган. Бунда давлат идораларига ёлғон маълумотлар тақдим этилган ва сохта ҳужжатлардан фойдаланилган.

 

Тергов материалларида қайд этилишича, Германияга кириб келган айрим шахсларга кейинчалик қалбаки Европа Иттифоқи ҳужжатлари ҳам тақдим этилган. Ушбу ҳужжатлар ёрдамида банк ҳисобварақлари очилган, мобил алоқа хизматлари расмийлаштирилган ҳамда турли давлат идоралари ва суғурта тизимларида рўйхатдан ўтиш ишлари амалга оширилган.

 

Ҳуқуқ-тартибот органлари ҳисоб-китобларига кўра, гуруҳ камида 76 нафар Ўзбекистон фуқароси учун виза расмийлаштирган бўлиши мумкин. Бир дона виза учун 2 минг евро, авиачипта учун яна 2 минг евро, қалбаки ҳайдовчилик гувоҳномаси учун эса 400 евро талаб қилингани айтилмоқда.

 

Тинтувлар давомида турли Европа давлатларига тегишли деб тахмин қилинаётган сохта шахсни тасдиқловчи ҳужжатлар, ҳайдовчилик гувоҳномалари, 20 дан ортиқ мобил телефон ва иккита ноутбук мусодара қилинган. Шунингдек, банк, суғурта ва рўйхатдан ўтишга оид ҳужжатлар ҳам олиб қўйилган.

 

Маълум қилинишича, тергов 2025 йил октябрь ойида Прагадан Амстердамга йўл олган халқаро автобусда Ўзбекистон фуқаросининг текширилиши ортидан бошланган. Унинг юклари орасидан бир нечта сохта Латвия шахсий гувоҳномалари ва қалбаки Полша ҳайдовчилик гувоҳномаси топилгач, терговчилар ушбу схема ортида турган шахсларни аниқлашга киришган.

 

Ҳозирда тергов ҳаракатлари давом этмоқда. Германия прокуратураси асосий гумонланувчига нисбатан қамоққа олиш эҳтиёт чорасини қўллаш масаласини кўриб чиқмоқда.