Тошкент бир уйни икки кишига сотган ака-укалар ушланди

 

Тошкент шаҳрининг Шайхонтоҳур туманида кўчмас мулк савдоси билан боғлиқ фирибгарлик ҳолати фош этилди. Мазкур ҳолат юзасидан ҳуқуқни муҳофаза қилувчи органлар томонидан тергов ҳаракатлари олиб борилмоқда. Бу ҳақда Тошкент шаҳар ИИББ маълум қилди.

 

Маълумотларга кўра, ака-ука бўлган икки фуқаро ўзларига тегишли уйни сотувга қўйган. Учтепа туманида яшовчи фуқаро мазкур уйга харидор сифатида қизиқиш билдирган ва томонлар ўртасида узоқ давом этган музокаралардан сўнг уй нархи 900 минг АҚШ долларига келишилган.

 

Келишувга кўра, харидор уй расмийлаштирилгунга қадар 363 минг АҚШ доллари миқдорида олдиндан тўловни амалга оширган. Қолган маблағ эса мулк ҳуқуқи расмийлаштирилгач тўланиши керак бўлган.

 

Бироқ сотувчилар пул маблағларини олганидан сўнг харидор билан алоқани тўхтатган. Фуқаро алданганини англаб, ички ишлар органларига мурожаат қилган.

 

Тергов давомида сотувчилар аванс пулини олганига қарамай, мазкур уйни бошқа шахсга сотиб юборгани аниқланган.

 

Мазкур ҳолат юзасидан 1986 ва 1987-йилларда туғилган фуқароларга нисбатан Ўзбекистон Республикаси Жиноят кодексининг 168-моддаси (фирибгарлик) билан жиноят иши қўзғатилган. Ҳозирда тергов ҳаракатлари давом эттирилмоқда.