Аҳоли мурожаатлари вақтида кўриб чиқмаган 19 нафар амалдор ишдан олинди

Президент Халқ қабулхонаси томонидан вазирликлар, идоралар ва ҳокимликларнинг фуқаролар мурожаатлари билан ишлаш фаолияти ўрганилди. Натижада 41 та вазирлик, идора ва ҳокимликда мурожаатларни кўриб чиқиш муддатлари 1070 та ҳолатда бузилгани аниқланган.

 

Маълум қилинишича, ўрганишлар Президентнинг 2026 йил 1 апрелдаги ПФ–51-сон фармони ижроси ҳамда аҳоли мурожаатларининг ўз вақтида ва сифатли кўриб чиқилишини таъминлаш мақсадида ўтказилган.

 

Аниқланган ҳолатлар юзасидан Президент Халқ қабулхонаси томонидан тегишли ташкилотлар раҳбарларига камчиликларни зудлик билан бартараф этиш, масъул ходимларни жавобгарликка тортиш ва бундай ҳолатларнинг такрорланишига йўл қўймаслик бўйича назорат хатлари юборилган.

 

Таҳлилларга кўра, ҳисобот даврида мурожаатларни кўриб чиқиш муддатларини энг кўп бузган ташкилотлар қуйидагилар бўлган:

 

• Андижон вилояти ҳокимлиги — 137 та ҳолат;
• Камбағалликни қисқартириш ва бандлик вазирлиги — 107 та ҳолат;
• Сурхондарё вилояти ҳокимлиги — 103 та ҳолат;
• Рақобатни ривожлантириш ва истеъмолчилар ҳуқуқларини ҳимоя қилиш қўмитаси — 79 та ҳолат;
• Ўзбекистон маҳаллалари уюшмаси — 65 та ҳолат;
• Тошкент шаҳар ҳокимлиги — 55 та ҳолат;
• Қашқадарё вилояти ҳокимлиги — 45 та ҳолат;
• Оила ва хотин-қизлар қўмитаси — 45 та ҳолат;
• Наманган вилояти ҳокимлиги — 44 та ҳолат.
  
  

Қайд этилишича, аниқланган камчиликлар юзасидан ташкилот ва идораларда ички хизмат текширувлари ўтказилган. Натижада 36 нафар ходим интизомий жавобгарликка тортилган, 19 нафар ходим эса эгаллаб турган лавозимидан озод этилган.

 

Шунингдек, ПФ–51-сон фармони талаблари асосида мурожаатларни кўриб чиқиш муддатларининг бузилишига йўл қўйган ҳамда аниқланган камчиликларни бартараф этиш бўйича чоралар кўрмаган 13 та вазирлик ва идорага оид материаллар ҳуқуқий баҳо бериш учун Бош прокуратурага тақдим этилган.